Ulytaý oblysynda aýyldyq okrýg ákimi zańbuzýshylyqtardy joiý týraly usynysqa ýaqytyly jaýap bermegeni úshin jaýapkershilikke tartyldy. Sot oǵan 27,5 myń teńge kóleminde aiyppul taǵaiyndady, dep habarlaidy Dalanews.kz.
"Jańaarqa aýdandyq soty aýyldyq okrýg ákimi, azamat S.-ǵa qatysty Ákimshilik quqyqbuzýshylyq týraly kodekstiń 479-baby (zańbuzýshylyqtardy joiý týraly usynysqa ýaqytyly jaýap bermeý) boiynsha ákimshilik isti qarady. (...) Sot jeńildetetin mán-jailardy eskere otyryp, azamat S.-ny kináli dep tanyp, oǵan 27 524 teńge kóleminde aiyppul saldy", – delingen habarlamada.
Ákimniń belgilengen merzimde tergeýshiniń zańbuzýshylyqtardy joiý týraly usynysyna jaýap bermeýi bul istiń qaralýyna negiz bolǵan.
Buǵan deiin, 2023 jylǵy 6 qarashada, aýdan aýmaǵynda sport kesheniniń qurylysyna arnalǵan qurylys materialdaryn urlaý faktisi boiynsha qylmystyq is qozǵalǵan. Osyǵan bailanysty 2024 jylǵy 12 qarashada tergeýshi Jańaarqa aýdany ákimine tiisti qujat joldaǵan. Ol 14 qarashada aýyl ákimine tapsyrylǵanymen, ákim bir ai ishinde jaýap bermegen.
Sot otyrysynda ákim óz kinásin tolyq moiyndap, belgilengen merzimde jaýap bere almaǵanyn elektrmen jabdyqtaýdaǵy máselelermen túsindirdi. Jeńildetetin mán-jailardy eskere otyryp, sot oǵan ákimshilik aiyppul salý týraly sheshim shyǵardy.
