Sol jaraqattan nár tata almai qalǵan jigittiń jaǵdaiy kúnnen-kúnge nasharlapty, dep habarlaidy Dalanews.kz KTK arnasyna silteme jasap.
Anasynyń aitýynsha, Shýmkov kinásin moiyndamai, mańailatpai qoiǵan. Ashynǵan jigit aqyry osyndai aýyr qylmysqa barǵan. Jaqyndary tergeý izoliatoryndaǵy aiyptalýshynyń jaǵdaiy odan beter nasharlap, júrip-turýdan qaldy deidi.
Aqpanda gastroenterolog Iýrii Shýmkovtyń qabyldaýyna jazylǵanda Nurjannyń turpaty zińgittei bolǵan. Anasynyń aitýynsha, asqazanyn tekserý úshin narkozben zond ótkizgende keńirdektegi shemirshegi synyp, eki aidyń ishinde 95-ten 64 keli salmaqqa bir-aq túsken. Sharasyz ana tamaq ishe almai qur súlderi qalǵan jigit dáriger qatesin moiyndamai, teris ainalǵannan osyndai qylmysqa barǵanyn aitady.
"Keiin bardy, mensiz bardy, kelinmen. Sol kezde baryp aitsa, tyńdamai salqyn shyǵaryp salypty. Óitkeni barlyq jerge baryp qaralǵanda, eshqandai dáriger alatynyn alyp, qaralatynyn qaralyp alǵannan keiin, tipti budan qasha bastady. Jazylmaǵannan keiin olar eshqandai diagnoz qoimady, qasha bastady", – deidi kúdiktiniń anasy Baqyt.
"Qolymen istegendi moinymen kóteredi” degen anasy Nurjan sotqa jetpei ólip kete me dep sary ýaiymǵa túsken. Tergeý izoliatorynda háli kúrt nasharlap ketipti. Qaǵaz júzinde “densaýlyǵy qalypty” degenderdiń sózine kúdikpen qaraidy.
"Ziltemirmen ákelip jolyqtyrady. Ne tura almaidy, ne júre almaidy, ne tamaq ishe almaidy. Janyndaǵy dáretin, qusqan qusyqtarynyń bárin janyndaǵy adamdar tógip qarap jatyr. Al dáriger qaraidy degeni, olar qaǵaz júzinde ǵana qarap jatyr. Negizinde balaǵa eshqandai em qoldanyp jatqan joq. Sebebi dárigerdi óltirdiń degendei balama qaramai otyr", – dep qosty anasy.
Óz dárigerin tý syrtynan atyp óltirgen jaǵa ustatarlyq jait sáýirdiń tórtinde boldy. Iýrii Shýmkov alǵan jaraqattan tilge kelmei sol jerde jan tapsyrdy. Politsiia tergeý qupiiasy degen jeleýmen osy ýaqytqa deiin qylmysqa qandai sebep itermelegenin aitpaǵan edi.
35 jastaǵy kúdikti Nurjan úsh balanyń ákesi. Jeke kásipkerlikpen ainalysqan. Osyǵan deiin isti bolmaǵan. Túrmege otyrsa da, “o dúniege attanyp ketpesin” dep shyryldaǵan ana jalǵyz ulynyń naqaqtan-naqaq qaraýsyz ólip ketpegenin qalaidy. Jáne barlyǵynan ózekti órtegen ókinishpen keshirim suraidy.
"Qurmetti Qazaqstan halqy, balamnyń qylyǵy úshin 19 million halyqtyń aldynda keshirim suraimyn. Qaitys bolǵan dárigerdiń otbasynan, týystarynan basymdy iip keshirim suraimyn, bizdi keshirsin", – dep túiindedi kúdiktiniń anasy Baqyt.
Aita keteiik, buǵan deiin Almatyda belgili dáriger Iýrii Shýmkovty óltirip ketkeni týraly habarlaǵan edik. Odan burynǵy emdelýshisi kek almaq bolǵan.
