Astanada oqys oqiǵadan qaza tapqan feldsher Uldana Myrzýannyń jesiri Ádilet Zeinel "Narodnaia partiia Kazahstana" arnasyna suhbat berip, jańa qarym-qatynasy, toi sýretteriniń jelige qalai taraǵany jáne burynǵy qaiyn jurtymen aradaǵy bailanysy týraly aitty, dep habarlaidy dalanews.kz.
Ádilet suhbatqa anasy Elza Ermanovamen birge kelgen. Onyń sózinshe, suhbat berýdegi basty maqsaty – qoǵamda taraǵan túrli pikirlerge jaýap berip, Uldanaǵa tiesili qarjynyń olardyń jeke qajettilikterine jumsalmaǵanyn túsindirý.
Ádilettiń aitýynsha, olar qýanyshty jańalyqty kópshilikke jariialamai, shaǵyn ortada ótkizýdi josparlaǵan. Alaida toi kezinde túsirilgen foto men videolar áleýmettik jelige tarap ketken.
"Sýrettegi – meniń qalyńdyǵym, áli áielim emes. Bul jaǵdaidyń talqylanatynyn bildik, biraq mundai deńgeide bolady dep oilamadyq. Meiramhana iesi men mobilograftardyń sýretter men videolardy jelige jariialaitynyn eskermeppiz", – dedi ol.
Suhbat barysynda Ádilettiń anasy Elza Ermanova da syn-pikirlerge jaýap berdi. Onyń aitýynsha, qazirgi ýaqytta olar Uldananyń ata-anasymen aralaspaidy.
"Balasynan aiyrylǵan adamnyń kóńil kúiin túsinemin. Sondyqtan eshkimdi renjitpei, tynysh qana ótkizgimiz keldi. Uldananyń naǵashy apasy bizdiń báribir týys bolyp qalatynymyzdy, Ádilet úilenemin dese qarsy bolmaitynyn aitqan. Biraq Uldananyń anasynan mundai sóz estimedik. Onyń júregin taǵy jaralaǵym kelmedi", – dedi ol.
Elza Ermanovanyń sózinshe, ázirge tek qyzdy uzatyp ákelý rásimi ótken. Al ul jaǵynan jasalatyn úlken toi kelesi jyldyń jazyna josparlanǵan.
Ádilet Zeinel de burynǵy qaiyn jurtymen qarym-qatynasynyń sýyǵanyn jasyrmady. Onyń aitýynsha, buǵan aqpan-naýryz ailarynda taraǵan úilený týraly qaýesetter sebep bolǵan.
"Uldananyń ápkeleri men týraly ártúrli áńgime aityp, jazyp júrdi. Keiin Uldananyń rýhyna Quran baǵyshtalatyn jiynǵa áriptesterimdi shaqyryp, meni shaqyrmady. Sol kezde menimen aralasqysy kelmeitinin túsindim", – dedi ol.
Onyń aitýynsha, Uldananyń týystarymen bailanysy aqpan aiynan bastap birtindep úzilgen.
Ádilettiń anasy ulynyń jubaiynan aiyrylǵannan keiin aýyr kezeńdi bastan ótkergenin de aitty.
"Ádilet qarasha aiynan beri jumysqa shyqqan joq. Jaǵdaiy nasharlap ketti. Biz onyń qaita ómirge aralasyp, adamdarmen sóilesip, ózine kelýin qaladyq. Ár adam baqytty bolýǵa laiyq dep oilaimyn. Esh jerde mindetti túrde bir jyl nemese jarty jyl kútý kerek dep jazylmaǵan. Men ana retinde balamnyń qaita kúlip júrgenin qaladym", – dedi Elza Ermanova.
Ádilet qazirgi qalyńdyǵymen mamyr aiynan bastap jaqyn aralasa bastaǵanyn aitty. Sondai-aq ol qalyńdyǵy Uldananyń jaqyn qurbysy bolǵan degen aqparatty joqqa shyǵardy.
"Ol Uldanamen qurby bolǵan emes. Ekeýi eki jyl bir jerde jumys istegenimen, bir ret qana birge aýysymǵa shyqqan. Tanys bolǵan, biraq jaqyn aralasyp, syrlasqan emes", – dedi ol.
Ádilet áleýmettik jelide qalyńdyǵynyń júkti ekeni týraly taraǵan áńgimege de toqtaldy. Ol bul aqparatty naqty rastamaǵanymen, bolashaqta taǵy da áke atanýǵa qarsy emes ekenin jetkizdi.
"Qazir kúlip, qaita ómirge aralasyp júrgenim – Allanyń, anamnyń jáne qasymdaǵy adamnyń arqasy. Ol maǵan jańa ómir syilady. Qazir ózimdi baqytty sezinemin", – dedi Ádilet Zeinel.
