Májilis depýtattary óńirlerdegi sý tasqynyna qatysty búgingi jaǵdaidy taǵy da sóz etti. Osy tusta "Amanat" partiiasynyń múshesi Maqsat Tolyqbai QR Parlamenti Májilis depýtattary atynan saýal joldady, dep habarlaidy Dalanews.kz.
Depýtat elimizdiń teń jartysy qaitadan sý astynda qalǵanyn jáne bul jaǵdai kóktemniń bastalýymen jyl saiyn qaitalanyp otyratynyn atap ótti.
"Jyldaǵy ádet. Kóktem keledi, Úkimettiń kóp ýádesi kólkip sýǵa ketedi. "Tasqynǵa tas-túiin daiynbyz, tótenshe jaǵdai bolsa, tótep beremiz", – delinetin kópirme baiandamalardan kók tiyn paida joq", - dedi depýtat.
Aitýynsha, tótenshe jaǵdaiǵa bailanysty birqatar depýtat sý basqan óńirlerge baryp, mán-jaiǵa tikelei qanyq bolǵan.
"Iá, apat aityp kelmeidi. Biraq qardyń qalyń jaýǵanyn kóz kórdi ǵoi. Másele – jergilikti ákimdikter men Úkimettiń arasynda bailanystyń joqtyǵynda. Saldarmen ǵana kúresip kelemiz. Topan sý men sel turmaq, álemde tsýnami men výlkannan qorǵaný sharalaryn qabyldaǵan elder bar. Al bizdiń keibir aýdandarda daiyn turýy tiis qaiyq pen sý etiktiń ózi atymen joq. Tótenshe jaǵdailar ministrliginiń normativi oryndalmaǵan. Ákimdik pen ministrlikterdiń arasynda baiyp-baǵa joq", - dedi ol.
Onyń sózinshe, sý salasynda bilikti maman tapshy.
"Bir ǵana boljammen esh nárse sheshilmeidi. Gidrolog, gidrotehnikterdiń keshendi jumysyn kórmedik. Iaǵni, ǵalymdarǵa jaǵdai jasalmai, esh nárse túzelmeidi degen sóz.
Joǵaryda aitqanymdai, biz kúni keshe Májilistegi áriptesterimizben birge halyqtyń jai-kúiimen, osy baǵytta qolǵa alynyp jatqan sharalarmen kózbe-kóz tanysý úshin Oral, Arqalyq, Aqtóbe, Ulytaý, Qoiandy jáne taǵy basqa óńirlerdi aralap qaittyq. Byltyr dál osy ýaqytta Qobda aýdanyndaǵy topan sý shaiyp ótken birneshe úige "AMANAT" partiiasy tarapynan qurylys materialdaryna deiin áperip, baspana saldyrtqan edik. Ókinishtisi, sol úiler taǵy da sýǵa ketti", - dedi ol.
Sonymen qatar ol jalpy baspanasy jermen-jeksen bolyp, bala-shaǵasymen bosyp ketken aǵaiynnyń máselesin kóterdi.
"Ras, Memleket basshysynyń: "Eshkim nazardan tys qalmaidy, zardap shekken turǵyndarǵa túgel kómek kórsetiledi", – degeni, dertke daýa, kóńilge medet. Biraq komissiia shyǵyndy eseptep, úiler salynǵansha kemi 4-5 ai ýaqyt ketedi. Osy kezde malmen jan baǵyp otyrǵan aǵaiyn tórt túligin tastap qaida barady? Maly óriste, ózderi aýdandaǵy kolledjde jaibaraqat jatady deisiz be?
Erteń el-jurttyń esin shyǵaratyn taǵy bir másele bar! Alystaǵy aýyldarda sýǵa ketken keibir úilerdiń áli kúnge deiin qujaty joq. Qora-qopsysy men qulaǵynda syrǵasy joq maldary týraly aitpai-aq qoiaiyn. Qazaq aýyldaǵy qorasyna qashan qujat rásimdetip edi? Olardy qaitemiz? Dalada qala ma? Osy jaǵyn da oilastyrý kerek", - dedi Tolyqbai.
Osy tusta ol joǵaryda aitylǵandardy eskere kelip, Úkimetke kelesi usynystardy joldady.
1) Qazaqstandaǵy barlyq ózenderdiń jaǵasynyń erekshe sý qorǵaý aýmaǵyn 4 shaqyrymǵa deiin uzartý jáne turǵyn úi salý men jer bólý kezinde ózen, kól, sý qoimasynyń jaǵasynan qashyq ári biik jerlerge qonystandyrý;
2) iri jáne jáne taýlardan aǵatyn transshekaralyq sýlar quiylatyn ózenderdiń qar men jańbyr sýy qosylǵanda tasyp ketpeýi úshin jasandy arnalar jasaý, asa qaýipti aýmaqtarda sý qoimalaryn salý, sondai-aq sý soratyn drenajdar men nasostardy qaita ornalastyrý;
3) ózen, kólge jaqyn ornalasqan aýyldardy qajetti tehnika, qaiyq jáne arnaiy formalarmen qamtamasyz etý;
4) gidrotehnik-injener mamandardyn daiyndaýǵa kóńil bólý;
5) biylǵy tótenshe jaǵdai jariialanǵan jerlerdegi sharýalardyń barlyq aýylsharýashylyq nesielerin tóleýdi úsh jylǵa deiin shegerý múmkindigin qarastyrý, – dedi ol.
