ءماجىلىس دەپۋتاتتارى وڭىرلەردەگى سۋ تاسقىنىنا قاتىستى بۇگىنگى جاعدايدى تاعى دا ءسوز ەتتى. وسى تۇستا "Amanat" پارتياسىنىڭ مۇشەسى ماقسات تولىقباي ق ر پارلامەنتى ءماجىلىس دەپۋتاتتارى اتىنان ساۋال جولدادى، دەپ حابارلايدى Dalanews.kz.
دەپۋتات ەلىمىزدىڭ تەڭ جارتىسى قايتادان سۋ استىندا قالعانىن جانە بۇل جاعداي كوكتەمنىڭ باستالۋىمەن جىل سايىن قايتالانىپ وتىراتىنىن اتاپ ءوتتى.
"جىلداعى ادەت. كوكتەم كەلەدى، ۇكىمەتتىڭ كوپ ۋادەسى كولكىپ سۋعا كەتەدى. "تاسقىنعا ءتاس-تۇيىن دايىنبىز، توتەنشە جاعداي بولسا، توتەپ بەرەمىز"، – دەلىنەتىن كوپىرمە باياندامالاردان كوك تيىن پايدا جوق"، - دەدى دەپۋتات.
ايتۋىنشا، توتەنشە جاعدايعا بايلانىستى ءبىرقاتار دەپۋتات سۋ باسقان وڭىرلەرگە بارىپ، ءمان-جايعا تىكەلەي قانىق بولعان.
"ءيا، اپات ايتىپ كەلمەيدى. ءبىراق قاردىڭ قالىڭ جاۋعانىن كوز كوردى عوي. ماسەلە – جەرگىلىكتى اكىمدىكتەر مەن ۇكىمەتتىڭ اراسىندا بايلانىستىڭ جوقتىعىندا. سالدارمەن عانا كۇرەسىپ كەلەمىز. توپان سۋ مەن سەل تۇرماق، الەمدە سۋنامي مەن ۆۋلكاننان قورعانۋ شارالارىن قابىلداعان ەلدەر بار. ال ءبىزدىڭ كەيبىر اۋدانداردا دايىن تۇرۋى ءتيىس قايىق پەن سۋ ەتىكتىڭ ءوزى اتىمەن جوق. توتەنشە جاعدايلار مينيسترلىگىنىڭ ءنورماتيۆى ورىندالماعان. اكىمدىك پەن مينيسترلىكتەردىڭ اراسىندا بايىپ-باعا جوق"، - دەدى ول.
ونىڭ سوزىنشە، سۋ سالاسىندا بىلىكتى مامان تاپشى.
"ءبىر عانا بولجاممەن ەش نارسە شەشىلمەيدى. گيدرولوگ، گيدروتەحنيكتەردىڭ كەشەندى جۇمىسىن كورمەدىك. ياعني، عالىمدارعا جاعداي جاسالماي، ەش نارسە تۇزەلمەيدى دەگەن ءسوز.
جوعارىدا ايتقانىمداي، ءبىز كۇنى كەشە ماجىلىستەگى ارىپتەستەرىمىزبەن بىرگە حالىقتىڭ جاي-كۇيىمەن، وسى باعىتتا قولعا الىنىپ جاتقان شارالارمەن كوزبە-كوز تانىسۋ ءۇشىن ورال، ارقالىق، اقتوبە، ۇلىتاۋ، قوياندى جانە تاعى باسقا وڭىرلەردى ارالاپ قايتتىق. بىلتىر ءدال وسى ۋاقىتتا قوبدا اۋدانىنداعى توپان سۋ شايىپ وتكەن بىرنەشە ۇيگە "AMANAT" پارتياسى تاراپىنان قۇرىلىس ماتەريالدارىنا دەيىن اپەرىپ، باسپانا سالدىرتقان ەدىك. وكىنىشتىسى، سول ۇيلەر تاعى دا سۋعا كەتتى"، - دەدى ول.
سونىمەن قاتار ول جالپى باسپاناسى جەرمەن-جەكسەن بولىپ، بالا-شاعاسىمەن بوسىپ كەتكەن اعايىننىڭ ماسەلەسىن كوتەردى.
"راس، مەملەكەت باسشىسىنىڭ: "ەشكىم نازاردان تىس قالمايدى، زارداپ شەككەن تۇرعىندارعا تۇگەل كومەك كورسەتىلەدى"، – دەگەنى، دەرتكە داۋا، كوڭىلگە مەدەت. ءبىراق كوميسسيا شىعىندى ەسەپتەپ، ۇيلەر سالىنعانشا كەمى 4-5 اي ۋاقىت كەتەدى. وسى كەزدە مالمەن جان باعىپ وتىرعان اعايىن ءتورت تۇلىگىن تاستاپ قايدا بارادى؟ مالى ورىستە، وزدەرى اۋدانداعى كوللەدجدە جايباراقات جاتادى دەيسىز بە؟
ەرتەڭ ەل-جۇرتتىڭ ەسىن شىعاراتىن تاعى ءبىر ماسەلە بار! الىستاعى اۋىلداردا سۋعا كەتكەن كەيبىر ۇيلەردىڭ ءالى كۇنگە دەيىن قۇجاتى جوق. قورا-قوپسىسى مەن قۇلاعىندا سىرعاسى جوق مالدارى تۋرالى ايتپاي-اق قويايىن. قازاق اۋىلداعى قوراسىنا قاشان قۇجات راسىمدەتىپ ەدى؟ ولاردى قايتەمىز؟ دالادا قالا ما؟ وسى جاعىن دا ويلاستىرۋ كەرەك"، - دەدى تولىقباي.
وسى تۇستا ول جوعارىدا ايتىلعانداردى ەسكەرە كەلىپ، ۇكىمەتكە كەلەسى ۇسىنىستاردى جولدادى.
1) قازاقستانداعى بارلىق وزەندەردىڭ جاعاسىنىڭ ەرەكشە سۋ قورعاۋ اۋماعىن 4 شاقىرىمعا دەيىن ۇزارتۋ جانە تۇرعىن ءۇي سالۋ مەن جەر ءبولۋ كەزىندە وزەن، كول، سۋ قويماسىنىڭ جاعاسىنان قاشىق ءارى بيىك جەرلەرگە قونىستاندىرۋ؛
2) ءىرى جانە جانە تاۋلاردان اعاتىن ترانسشەكارالىق سۋلار قۇيىلاتىن وزەندەردىڭ قار مەن جاڭبىر سۋى قوسىلعاندا تاسىپ كەتپەۋى ءۇشىن جاساندى ارنالار جاساۋ، اسا ءقاۋىپتى اۋماقتاردا سۋ قويمالارىن سالۋ، سونداي-اق سۋ سوراتىن درەناجدار مەن ناسوستاردى قايتا ورنالاستىرۋ؛
3) وزەن، كولگە جاقىن ورنالاسقان اۋىلداردى قاجەتتى تەحنيكا، قايىق جانە ارنايى فورمالارمەن قامتاماسىز ەتۋ؛
4) گيدروتەحنيك-ينجەنەر مامانداردىن دايىنداۋعا كوڭىل ءبولۋ؛
5) بيىلعى توتەنشە جاعداي جاريالانعان جەرلەردەگى شارۋالاردىڭ بارلىق اۋىلشارۋاشىلىق نەسيەلەرىن تولەۋدى ءۇش جىلعا دەيىن شەگەرۋ مۇمكىندىگىن قاراستىرۋ، – دەدى ول.
