Premer-Ministrdiń orynbasary – ulttyq ekonomika ministri Nurlan Baibazarovtyń tóraǵalyǵymen ótken Ekonomikadaǵy ósimdi qamtamasyz etý jónindegi jedel shtab otyrysynda birinshi jartyjyldyqtaǵy ekonomika salalarynyń damý kórsetkishteri qaraldy, - dep habarlaidy Dalanews.kz.
Ótken jylmen salystyrǵanda aqparat jáne bailanys salasynda (8,7%), qurylysta (8,6%), kólikte (7,3%) turaqty ósimge qol jetkizildi.
Aita ketý kerek, biylǵy bes aidyń qorytyndysymen salystyrǵanda aýyl sharýashylyǵy, qurylys jáne saýda salalarynda ósý qarqyny jaqsarǵany baiqalady. Sonymen qatar OPEK+ mindettemeleri sheńberinde munai óndirý kóleminiń qysqarýyna jáne sý tasqyny kezeńinen keiin júrgizilip jatqan qalpyna keltirý jumystaryna bailanysty birqatar salada birshama artta qalýshylyq baiqalyp otyr.
«4 ailyq báseńdeýden keiin maýsym aiynyń qorytyndysy investitsiialardy jumyldyrý, otandyq taýar óndirýshilerdi qoldaý, iskerlik belsendilikti yntalandyrý sharalary, sondai-aq qurylys, avtojol, aýyl sharýashylyǵy salalaryndaǵy aldaǵy belsendi kezeń esebinen ekonomikanyń ósý traektoriiasyna shyǵýyna negiz qalady», - dep Nurlan Baibazarov, biylǵy iskerlik belsendilik indeksi bes ai qatarynan oń aimaqta turǵanyn atap ótti.
Óńdeý ónerkásibi nysanaly indikatorlar sheginde (5,1%-ǵa) ósip keledi. Óńdeý ónerkásibi salalary ishinde metallýrgiia óndirisiniń – 8,3%-ǵa, mashina jasaýdyń – 9,4%-ǵa, himiia ónerkásibiniń – 5,3%-ǵa, jihaz jasaýdyń – 28,3%-ǵa, farmatsevtikanyń – 14,8%-ǵa ósýi qamtamasyz etildi. Ósimge otandyq taýar óndirýshilerdi qoldaý sharalaryn jetildirý nátijesinde qol jetkizildi. Búgingi tańda OTÓ-men jasalǵan sharttardyń sany 2023 jylǵy 22,7 myńmen salystyrǵanda 45,7 myńǵa deiin artty.
Jeńil ónerkásip, qurylys materialdary óndirisiniń kólemin ulǵaitý, sondai-aq azyq-túlik ónimderi salasynda jáne t. b. jumystar jalǵasýda.
Qurylysta jumys kólemi bes aidaǵy 8,1% kórsetkishpen salystyrǵanda ósip, 8,6%-dy qurady. Qarastyrylyp otyrǵan kezeńde 7,4 mln sharshy metr turǵyn úi paidalanýǵa berildi, bul ótken jyldyń sáikes kezeńinen 1%-ǵa artyq. Qoldanystaǵy jeńildikti jáne jalǵa beriletin baǵdarlamalar men jańa turǵyn úi baǵdarlamalary («Otaý», «Naýryz») sheńberinde 54,2 myń otbasy ózderiniń turǵyn úi jaǵdaiyn jaqsartýy tiis.
Infliatsiia máselesine erekshe nazar aýdaryldy. 90 túrli sharany iske asyrýdyń nátijesinde kórsetkishter 2023 jylǵy maýsym aiyndaǵy 14,6%-dan aǵymdaǵy 8,4%-ǵa deiin tómendedi. Bul rette azyq-túlik taýarlary boiynsha infliatsiia 5,4%, al ózge taýarlar boiynsha 7,4% qurady. Jalpy, biyl nysanaly dáliz 6-8% kóleminde. Importtyq taýarlardy almastyrý boiynsha investitsiialyq jobalar belsendi túrde iske asyrylyp jatyr, baǵa belgileýdi baqylaý, monopoliiaǵa qarsy jáne syrtqy saýdany retteý jumystary jalǵasýda.
Investitsiialar aǵyny da el ekonomikasynyń ósýine áser etedi. Bul baǵytta aqparat jáne bailanys, kólik, bilim berý jáne óńdeý ónerkásibi salalary oń dinamika kórsetýde. Jarty jyl ishinde jalpy somasy 151 mlrd teńgege 18 joba iske qosyldy, onyń 122,7 mlrd teńgesi – sheteldik qatysýy bar úles. Investitsiialyq shtabtyń júieli jumysy aiasynda shamamen $30 mlrd somasyna 65 investitsiialyq joba boiynsha problemalyq máseleler sheshildi, sondai-aq zańnamaǵa 57 ózgeris ázirlendi, onyń ishinde búginde 26 buiryq qabyldandy.
Buǵan qosa, TKSh-ny jańǵyrtý, agroónerkásiptik keshendi damytý jónindegi jumys qarqyny qaraldy.
Otyrys qorytyndysy boiynsha ekonomikanyń barlyq salasynda josparlanǵan kórsetkishterden tómen emes deńgeide ósimdi qamtamasyz etý boiynsha naqty tapsyrmalar berildi. Ekonomikadaǵy ósimdi qamtamasyz etý jónindegi óńirlik jedel shtabtar jumys isteidi. Olarǵa ákimniń árbir kórsetkish boiynsha jaýapty orynbasarlary bekitilgen.
