Oljas Bektenovtiń Úkimet basshysy qyzmetine taǵaiyndalýyna qatysty «Alternativa» ózekti zertteýler ortalyǵynyń direktory, saiasattanýshy Andrei Chebotarev pikir bildirdi, dep jazdy Dalanews.kz.
Onyń sózine qaraǵanda, Bektenov elimizde taǵaiyndalǵan eń jas premer-ministr bolýy múmkin. Al bul onyń Qazaqstandaǵy qazirgi jaǵdaida kóp máseleniń sheshimin tabýǵa yqpal etetini sózsiz.
"Qazaqstan úkimetine alǵash ret kúshtik qurylym ókili basshylyqqa keldi. Iá, eks-premerler Ákejan Qajygeldin men Kárim Másimov bir kezderi arnaiy qyzmette istegenin bilemiz. Alaida, olar burynyraqta – KSRO zamanynda bolǵan edi. Táýelsiz Qazaqstanda ekeýi de memlekettik qyzmetke biznes salasynan keldi", - dedi sarapshy.
Ol Oljas Bektenovtiń jiyrma jyldan astam ýaqyttan beri úzdiksiz memlekettik qyzmette eńbek etip kele jatqanyn alǵa tartty.
"Onyń ústine, 10 jyldan asa ýaqyt sybailas jemqorlyqqa qarsy kúresetin organda qyzmet etkenin bilemiz. Sybailas jemqorlyqqa qarsy is-qimyl agenttiginiń tóraǵasyna deiin kóterilgen», – deidi saiasattanýshy.
Andrei Chebotarevtyń sózine qaraǵanda, 2022 jyly aqpan aiynda Bektenovtiń Sybailas jemqorlyqqa qarsy is-qimyl agenttiginiń tóraǵasy bolyp taǵaiyndalýy Memleket basshysy Qasym-Jomart Toqaevtyń oǵan qatty senetinin kórsetedi.
"Bektenov premer-ministr bolyp taǵaiyndalsa, ol uiymdastyrý-baqylaý máselelerine, memlekettik apparattaǵy jemqorlyqqa qarsy turýǵa, zańsyz jolmen tapqan aktivterdi memleket baqylaýyna qaitarýǵa jáne jańa «oiyn erejelerin» saqtaý boiynsha iri biznes ókilderimen ózara is-áreket jasaýǵa basymdyq beredi. Osyǵan orai, ekonomikany jáne áleýmettik salany basqarý isi jetekshilik etýshi vitse-premerlerge júkteletin bolady. Demek, Úkimetke aibar kórsetetin, iri isterdi atqaratyn ýaqyt keldi. Qazirgi ahýal sony talap etip tur. Tyń ózgerister jasaý úshin jastyq jiger qajet. Bul jiger Bektenovtiń boiynan tabylady degen oidamyn. Óitkeni, joǵaryda aitqan derekterimdi negizge alyńyz», – dedi «Alternativa» ózekti zertteýler ortalyǵynyń direktory.
Ol, jalpy sózden iske kóshetin ýaqyttyń kelgenin atap ótti. Bul oraida, jańa minkabinet asa belsendilik tanytýy qajet.
