Qarjy ministri Mádi Takiev pen ulttyq ekonomika vitse-ministri Azamat Ámrin biznes ókilderimen salyq reformasy sheńberinde QQS saralanǵan mólsherlemelerin belgileý jónindegi Úkimet usynystaryn talqylady, dep habarlaidy Dalanews.kz Úkimettiń baspasóz qyzmetine silteme jasap.
- Biz mynadai tetikti qarastyrýdy usynamyz: jalpy belgilengen QQS mólsherlemesi 16%, aýyl sharýashylyǵy ónimderin óndirýshilerdi QQS-tan tolyq bosatý, al birqatar salalar úshin – 10% mólsherindegi aralyq mólsherleme. Osylaisha, Úkimet usynyp otyrǵan mólsherlemelerdi saralaý: 16%, 10%, 0% jáne bosatý, - dep túsindirdi Azamat Ámrin.
Qarjy ministri Mádi Tákiev salyq júiesi teńgerimdi bolýy tiis ekenin jáne ol biznes pen memlekettiń múddelerin eskerýi kerek ekenin aitty.
- Búgin biz basty máselelerdiń birin talqylaý úshin jinaldyq, bul qosylǵan qun salyǵyna qatysty. Biz óńirlerde Ekonomika, Qarjy ministrlikteriniń, «Atameken» palatasynyń ókilderi qatysatyn kóptegen kezdesý ótkizemiz. Jumys úlken jáne jan-jaqty. Bizdiń meken-jaiymyzǵa kelip túsken barlyq usynystar tyńdalady. Biz biryńǵai ustanymdy qalyptastyramyz, óitkeni Salyq kodeksi óte qarapaiym, túsinikti, naqty bolýy tiis, - dep atap ótti Mádi Takiev.
Qazirgi ýaqytta agrarlyq sektorda sharýa qojalyqtary QQS tólemeitini, al zańdy tulǵalar qolda bar jeńildikterge bailanysty biýdjetke tóleýge tiisti salyqtardyń tek 30%-yn tóleitini atap ótildi. Jańa tetikter boiynsha olardyń eshqaisysy QQS tólemeitin bolady. Bul qazaqstandyq aýyl sharýashylyǵy ónimderin (kartop, qyzanaq, piiaz jáne basqalary) básekege qabiletti etýge múmkindik beredi. 10% mólsherleme qoldanylatyn salalardyń túrleri biznespen áli de talqylanyp jatyr.
Sondai-aq kezdesýde jeńildetilgen deklaratsiia men bólshek salyq rejimin, onyń máni – kiris shegin jylyna 600 myń AEK (2 mlrd 359 mln teńge) mólsherinde saqtai otyryp, qaita qaraý boiynsha usynystar aityldy. Negizgi ózgeris – bul rejimdi tek B2C segmentinde (bólshek saýdada) júzege asyrý. Jumysshylar sany boiynsha shekteýdi alyp tastaý usynyldy. Kásipkerdiń satýdan túsken tabysy jylyna 100 mln teńgeden asatyn bolsa, salyq salynatyn tabysty eńbekaqy qory (eńbekaqy tóleý qory) somasyna azaitý múmkindigi kózdelgen. Osylaisha, 100 mln teńge shegi jalaqyny aqtaýǵa yntalandyrýǵa múmkindik beredi. Bul rette bólshek salyqtyń 4% mólsherlemesi (máslihattardyń 50%-ǵa tómendetý múmkindigimen) saqtalady.
