OPEK+ munaidyń negizgi eksporttaýshy elderi arasyndaǵy munai óndirýdi shekteý jónindegi kelispeýshilikter munaidyń álemdik baǵasynyń aitarlyqtai tómendeýine alyp keldi. Búgin, 2020 jylǵy 9 naýryzda Brent markaly munai álemdik naryqtarda 30%-dan astam tómendep, bir barreli 31-33 dollar kóleminde saýdalanýda.
Osy jaǵdaiǵa bailanysty Úkimet pen Ulttyq Bank júrgizilip jatqan memlekettik saiasattyń basymdyqtary makroekonomikalyq turaqtylyqty jáne salyq-biýdjet saiasatynyń tiimdiligin qamtamasyz etý, infliatsiialyq protsesterdi basqarý jáne eldegi áleýmettik turaqtylyqty saqtaý bolyp qalatynyn málimdeidi.
Syrtqy naryqtardaǵy qalyptasqan ahýalǵa jáne onyń Qazaqstan ekonomikasyna áser etýine turaqty monitoring júrgiziledi. Qajetti sheshimderdi jedel qabyldaý jáne olardy júzege asyrý úshin Premer-Ministrdiń basshylyǵymen Shtab quryldy.
Úkimettiń biýdjet saiasatynyń sharalary áleýmettik mindettemelerdi tolyq kólemde oryndaýǵa baǵyttalatyn bolady. Basym emes biýdjet shyǵyndaryn qysqartý sharalary qabyldanady.
Úkimet pen jergilikti atqarýshy organdar baǵanyń negizsiz ósýin, ásirese áleýmettik mańyzy bar taýarlar men qyzmetterge baǵanyń ósýin boldyrmaýǵa erekshe nazar aýdaratyn bolady.
Qyzmetkerlerdiń sanyn qysqartýǵa jol bermeýdi jáne eńbekaqyny ýaqytyly tóleýdi qamtamasyz etýdi qosa alǵanda, azamattardyń eńbek quqyqtarynyń saqtalýyna qatań baqylaý qamtamasyz etiledi.
Óz mandaty aiasynda Ulttyq Banktiń tiisti resýrstary bar jáne bazalyq mólsherlemeni arttyrý jáne adekvatty baǵamdyq saiasatty júrgizý arqyly monetarlyq saiasatty qatańdatý jolymen baǵalardyń turaqtylyǵyn qamtamasyz etý boiynsha qajetti qadamdardy qabyldaityn bolady. Atalǵan sharalar infliatsiianyń jedeldeýin shekteidi, ulttyq valiýta baǵamynyń shamadan tys qubylmalylyǵyna jol bermeýge múmkindik beredi.
Ulttyq Bank valiýta naryǵyn turaqtandyrýdy qamtamasyz etý jáne qarjylyq turaqtylyqty qamtamasyz etý úshin qajetti valiýtalyq interventsiialar júrgizetin bolady. Ulttyq banktiń teńgeniń aiyrbas baǵamymen alyp-satarlyq operatsiialardy boldyrmaý úshin altyn-valiýta aktivteriniń jetkilikti kólemi, sondai-aq retteýish quraldardy qosa alǵanda, barlyq qajetti quraldary bar.
Qarjy naryǵyn retteý jáne damytý agenttigi qarjy naryǵyndaǵy turaqtylyqty saqtaý jóninde sharalar qabyldaityn bolady.
Úkimet pen Ulttyq Bank teris saldarlardy azaitý jáne Qazaqstan Respýblikasynyń áleýmettik-ekonomikalyq damýynyń turaqtylyǵyn qamtamasyz etý úshin qajetti resýrstarǵa ie.
