Ulttyq ekonomika ministri Nurlan Baibazarov úkimettiń Qazaqstan ekonomikasyna 9,6 trln teńge investitsiia quiatynyn aitty. Biraq naqty merzimderi jaily pikir bildirmedi.
Baibazarovtyń aitýynsha, investitsiianyń basym bóligi biýdjetten tys kózderden keledi. Onyń ishinde ulttyq holdińder, ishki jáne syrtqy kapital naryqtary, jeke jáne halyqaralyq qarjy salymdary bar.
«Biýdjetten tys investitsiialar kólemi — 7 trln teńge. Atap aitqanda, «Samuryq-Qazyna» jáne «Báiterek» holdińderi, ekinshi deńgeili bankterdiń ishki resýrstary men ózge de institýttyq investorlar tarapynan» deidi ministr.
Aqpannyń basynda úkimet 2024 jyly ekonomika ósimi keminde 5,3% bolady dep boljam jasaǵan. Al byltyrǵy deńgei 5,1% bolǵan. Kóshbasshy salalarǵa kelsek, qurylys salasyndaǵy ósim 13,3% bolsa, saýdada — 11,3%, aqparat jáne bailanysta — 7,1%, kólik qyzmetteri — 6,9%, ónerkásipte — 4,3%. Byltyr infliatsiia 2 ese tómendep, 9,8% bolǵan edi. Biyl úkimet shamamen 6-8% shamasynda ustap turýdy josparlap otyr. Nurlan Baibazarov qazirgi ýaqytta tranzittik áleýetti damytý maqsatynda júk vagondary jańartylyp jatqanyn atap ótti. Al temirjol parkin jańartý úshin otandyq zaýyttar tartylyp jatyr.
Mamyr aiynyń sońynda «Jolaýshylar tasymaly» kompaniiasynyń basqarma basshysy Jánibek Taijanov Astanada alǵash ret qurastyrylǵan shveitsariialyq Stadler-diń jolaýshylar vagony 2025 jyldyń jeltoqsanynda kompaniia qaramaǵyna ótetinin aitqan. Osylaisha aldaǵy jyly qalaaralyq tasymalǵa 100-ge tarta vagon alynady. «Báiterek» «Qazaqstan temir jolyna» otandyq vagondar alyp jatqanyn da atap ótý kerek. Qańtardyń sońynda Ulttyq bank «Báiterektiń» obligatsiialaryna 173 mlrd teńge kóleminde zeinetaqy aktivterin salǵan edi. Al aqpannyń aiaǵynda BJZQ-dan vagon alýǵa bólinetin soma 184 mlrd teńgege óskeni týraly Kólik ministri Marat Qarabaev habarlaǵan. Bul qarajatqa 3,3 myń vagon alýǵa jumsalady. Onyń 122-si ǵana — jolaýshylarǵa arnalǵan. Bir júk vagonynyń quny shamamen 30-35 mln teńge eken. Al jolaýshylar vagon — 700-800 mln teńge shamasynda. Vagondardy «ZIKSTO» jáne «KVK» firmalary daiyndaidy.
