Qarjylyq monitoring agenttiginiń Almaty qalasy boiynsha departamenti memlekettik satyp alý salasynda jasalǵan iri alaiaqtyq deregi boiynsha tergep-tekserý jumystaryn aiaqtady. Tergeý barysynda jalǵan jumys tájiribesin rásimdeý arqyly kompaniialarǵa tenderlerge qatysýǵa zańsyz múmkindik bergen qylmystyq shema anyqtalǵan, dep habarlaidy dalanews.kz.
Vedomstvo málimetinshe, «KazStroyOpyt LTD» JShS basshysy konsaltingtik qyzmet kórsetý syltaýymen kommertsiialyq uiymdarǵa qurylys jumystary boiynsha jalǵan tájiribe jasap berý shemasyn uiymdastyrǵan. Ol úshin «Elektrondyq depozitarii» júiesine oryndalǵan jumystar men nysandardy paidalanýǵa berý týraly jalǵan aktiler engizilip otyrǵan.
Osylaisha, klient-kompaniialar memlekettik satyp alýlarǵa qatysý kezinde negizsiz artyqshylyqtarǵa ie bolǵan. Zańsyz qyzmet áleýmettik jeliler men internet-platformalar arqyly ashyq jarnamalanǵan.
Tergeý málimetine sáikes, qylmystyq top quramynda 11 adam bolǵan. Sonymen qatar, Shymkent qalasynyń Sáýlet, qala qurylysy jáne jer qatynastary basqarmasynyń laýazymdy tulǵalaryna jalǵan jumys tájiribesin rastaǵany úshin zańsyz syiaqy jetkizip otyrǵan deldaldar da anyqtalǵan.
Qylmystyq kiristerdi zańdastyrý maqsatynda baqylaýdaǵy birneshe zańdy tulǵa paidalanylyp, olardyń shottary arqyly qarajat qolma-qol aqshaǵa ainaldyrylyp otyrǵan. Aldyn ala esep boiynsha zańsyz tabys kólemi 490 million teńgeden asqan.
Tergep-tekserý barysynda jalǵan jumys tájiribesin paidalanyp, memlekettik satyp alýlarǵa qatysqan 56 kompaniia anyqtaldy. Atalǵan materialdar quzyrly organdarǵa tekserý júrgizý úshin joldanǵan.
Qazirgi ýaqytta úsh kúdikti qamaýǵa alynsa, taǵy segiz adamǵa qatysty eshqaida ketpeý týraly bultartpaý sharasy qoldanyldy. Qylmystyq is sotqa joldanǵan.
QMA málimetinshe, mundai zańsyz áreketter adal emes kompaniialarǵa memlekettik kelisimsharttarǵa qol jetkizýge múmkindik berip, sapasyz jobalardyń júzege asý qaýpin arttyrady ári adal kásipkerlerdi teń emes jaǵdaiǵa qoiady.
