Qazaqstan Úkimeti áleýmettik jelilerdegi utys oiyndaryna qatysty óz ustanymyn bildirdi, dep habarlaidy Dalanews.kz.
“Halyq pen blogosfera ókilderin zańnamany saqtaýdyń mańyzdylyǵy jóninde habardar etý maqsatynda tsifrlyq ortada quqyq buzýshylyqtardyń aldyn alý boiynsha aqparattyq-túsindirý jumystary júrgizilýde. Bul is-sharalar «Zań jáne tártip» media-jospary aiasynda júzege asyrylyp, azamattardyń quqyqtyq saýattylyǵyn arttyrýǵa jáne zań buzýshylyqtardyń aldyn alýǵa baǵyttalǵan (zańsyz lotereialar, jalǵan treningter men kúmándi aktsiialardyń aldyn alý)”, — dedi Májilis depýtattarynyń suraǵyna jaýap bergen Premer-Ministrdiń orynbasary – Ulttyq ekonomika ministri Serik Jumanǵarin.
Onyń aitýynsha, Mádeniet jáne aqparat ministrligi Instagram, TikTok, Meta syndy áleýmettik jelilermen tyǵyz jumys júrgizip, aqparattyq keńistiktiń ashyqtyǵyn qamtamasyz etý jáne alaiaqtyq shemalardyń jolyn kesý boiynsha sharalar qabyldaýda.
"Tsifrlyq ortadaǵy zań talaptary men zańsyz áreketterdiń saldary týraly aqparattyq materialdar taratylyp jatyr. Internet keńistigin táýlik boiy baqylaý júrgizilip, quqyq buzýshylyqtardy anyqtaý jáne jedel áreket etý sharalary qolǵa alynǵan. 2025 jyldyń basynan beri monitoring barysynda internet-alaiaqtyqtyń 1870 faktisi anyqtaldy, onyń 389-y áleýmettik jelilerde oryn alǵan. 1480 internet-resýrs pen siltemege qoljetimdilik shekteldi. Internet-kazino qyzmetine qatysty 8616 zańbuzýshylyq anyqtalyp, onyń 6399-y áleýmettik jelilerde tirkelgen, 2195 internet-resýrs pen silteme buǵattalǵan", — dep tolyqtyrdy ministr.
Infliýenserler tabysyn kásipkerlik qyzmetke jatqyzý kriteriilerin ázirleý máselesine toqtalǵan Jumanǵarin zań boiynsha infliýenser (bloger) – bul onlain-platformada belgisiz tulǵalar tobyna arnalǵan aqparat jariialaityn jáne ony kásipkerlik maqsatta júzege asyratyn paidalanýshy ekenin aitty.
"Qoldanystaǵy zańnamada infliýenserlerdiń kásipkerlik qyzmeti rettelgen jáne tsifrlyq ortada zańsyz lotereialar men ózge de quqyq buzýshylyqtar úshin jaýapkershilik belgilengen", — dep atap ótti vitse-premer. Onyń aitýynsha, lotereiany lotereia operatory bolyp tabylmaityn adamnyń ótkizýine tyiym salynǵan.
Qazaqstanda resmi lotereia operatory retinde 15 jylǵa litsenziia berilgen "Sátti Juldyz" aktsionerlik qoǵamy bekitilgen.
"2024 jyldyń 1 qańtarynan 2025 jyldyń 20 naýryzyna deiin «Lotereialar jáne lotereia qyzmeti týraly» zań normalaryn buzýdyń 169 faktisi anyqtalyp, 19 nusqama berildi. Týrizm jáne sport ministrliginiń oiyn biznesi men lotereia qyzmetin retteý komiteti Ákimshilik quqyq buzýshylyq týraly kodekstiń 445-1-babyna sáikes zańsyz lotereia uiymdastyrǵandardy jaýapkershilikke tartady. Zańbuzýshylarǵa 100-den 2000 ailyq eseptik kórsetkishke deiingi kólemde aiyppul salynyp, zańsyz jolmen alynǵan tabysy tárkilenedi. 2024 jyldyń aqpan aiynan bastap komitettiń Qarjylyq monitoring agenttiginiń qoldaýymen júrgizgen jumysy nátijesinde 113 adam ákimshilik jaýapkershilikke tartylyp, jalpy somasy 50 mln teńgeden astam aiyppul salyndy. Bul baǵyttaǵy jumystar Úkimettiń baqylaýynda", — dep túiindedi Jumanǵarin.
