Kaspii teńizindegi áskeri oqý-jattyǵý kezinde aman qalǵan 20 jastaǵy matros Beket Qýandyq jaǵalaýǵa jetý úshin shamamen 400-500 metr júzgen. Onyń qalai qutylǵanyn ákesi Baqytbek Kenjeǵulov aityp berdi, dep dalanews.kz tilshisi BURSH_MEDIA Instagram paraqshasyna silteme jasap habarlaidy.
Ákesiniń sózinshe, Beket áskerge bir jyl buryn, týǵan kúninde attanǵan. Ol dziýdodan sport sheberi, stýdent jáne bolashaq dene shynyqtyrý pániniń muǵalimi.
Oqý-jattyǵý kezinde áskeri qyzmetshiler sýdyń tereń bóligine túsken. Sol sátte Beket sabyr saqtap, jaǵalaýǵa qarai júzýge sheshim qabyldaǵan.
"Men ózimdi sabyrǵa kelip, jaǵaǵa qarai júzdim", – dep aitqan ol týystaryna.
Baqytbek Kenjeǵulovtyń aitýynsha, uly bala kezinen júzýdi jaqsy meńgergen jáne fizikalyq daiyndyǵy joǵary bolǵan. Sonyń arqasynda ol shamamen 400-500 metr qashyqtyqty júzip ótip, jaǵalaýǵa jetken.
Ata-anasy Bekettiń áskerden aman-esen oralýyna orai toi jasaýdy josparlap, dámhanaǵa aldyn ala tapsyrys bergen. Alaida sarbaz qaza tapqan qarýlastaryn eske alyp, ákesinen saltanatty jiyn ótkizýdi suramaǵan.
"Áke, qajet emes, saltanatty jiyn ótkizbeńizder. Dostarymnan aiyrylǵanda men qalai toilai alamyn?" – degen ol.
Osylaisha, Bekettiń úige aman oralý qýanyshy qarýlastarynan aiyrylǵan aýyr qaiǵymen qatar kelgen.
