Úkimet Atyraý oblysyna respýblikalyq biýdjetten qosymsha qarjy bólý qajettigin zerdelep jatyr. Bul úshin aldymen óńir biýdjetine naqty qansha qarajat túskeni jáne oblystyń josparlanǵan kiris kólemin oryndai alatyny jan-jaqty taldanady, dep habarlaidy dalanews.kz.
Tek osy taldaý nátijelerinen keiin óńirge qarjylai qoldaý kórsetý máselesi boiynsha sheshim qabyldanady.
Boljamǵa sáikes, 2026 jyly Atyraý oblysynyń biýdjetine 1,145 trln teńge túsýi tiis. Alaida alǵashqy bes aidyń qorytyndysy boiynsha biýdjetke 335,9 mlrd teńge ǵana túsken.
Úkimettiń málimetinshe, óńir kirisiniń tómendeýine birneshe faktor áser etken. Sonyń biri – Teńiz ken ornyndaǵy úshinshi býyn zaýytynyń qurylysy aiaqtalǵannan keiin jeke tabys salyǵy men áleýmettik salyqtan túsetin túsimderdiń azaiýy.
Sonymen qatar «Teńiz» jobasyna qatysty salyq salý erekshelikterine bailanysty múlik salyǵynan túsetin kiris te qysqarǵan. Budan bólek, jyl basyndaǵy alǵashqy toqsanda benzin men dizel otyny baǵasyn kóterýge engizilgen moratorii saldarynan aktsizderden túsetin túsim de tómendegen.
Soǵan qaramastan, 2026 jyly Atyraý oblysynan respýblikalyq biýdjetke alynatyn biýdjettik alyp qoiý kólemi 262,4 mlrd teńgeni quraidy. Qoldanystaǵy zańnamaǵa sáikes, bul soma úsh jyldyq biýdjettik kezeń aiaqtalǵanǵa deiin ózgertilmeidi.
