Úkimet Pavlodar, Ekibastuz jáne Aqsý qalalarynda jylý jelilerin salýǵa jáne rekonstrýktsiialaýǵa 9 milliard teńge bóldi, - dep habarlaidy Dalanews.kz.
Premer-ministr Oljas Bektenov Úkimet rezervinen 9 milliard teńge bólý týraly qaýlyǵa qol qoidy.
"Pavlodarda (3,6 milliard teńge) uzyndyǵy 2,5 shaqyrym bolatyn TM-13 jylý magistrali salynady. Bul 41,5 myń adam turatyn Pavlov – Shevchenko – Kataev kósheleri ornalasqan aýdandaǵy kóppáterli turǵyn úilerdi turaqty jylýmen qamtamasyz etýge múmkindik beredi.
Ekibastuzda jalpy uzyndyǵy shamamen 4 shaqyrym (3,6 milliard teńge) bolatyn TM-1 jáne TM-3 jylý magistraldarynyń ýchaskeleri rekonstrýktsiialanady. Osy jumystyń arqasynda jańa turǵyn úilerdi, áleýmettik mekemelerdi, shaǵyn jáne orta biznes nysandaryn qosý kózdelgen. Bul 2 myńnan asa adamdy qamtidy", - dep jazylǵan Úkimettiń habarlamasynda.
Qalǵan 1,8 milliard teńge Aqsýdaǵy №3,5 jáne 8 shaǵynaýdandarda ornalasqan, uzyndyǵy 4,3 shaqyrym bolatyn oramishilik jylý jelilerin qaita jańartýǵa aýdarylady. Keiingi 2 jylda bul ýchaskelerde 40-tan asa aqaý tirkelgen. Rekonstrýktsiia jumysy 1,5 myńnan asa jergilikti turǵyndy sapaly jylýmen qamtamasyz etýge múmkindik beredi.
Pavlodar oblysy ákimdiginiń derekterine súiensek, búgingi tańda Pavlodarda jylýmen jabdyqtaý jelileriniń uzyndyǵy 828,1 shaqyrym (82,8 paiyzy ortasha tozǵan), Ekibastuzda 422,5 shaqyrym (90,7 paiyz), Aqsýda 99,1 shaqyrym (59 paiyz) bolady. Tehnikalyq tekserý nátijeleri boiynsha shuǵyl jumystar júrgizilýge tiis, qatty tozǵan 4 ýchaske anyqtalǵan.
