Qazaqstanda aldaǵy jyldary avtomobil joldary infraqurylymyn jańǵyrtý aýqymdy deńgeide júzege asyrylmaq. Memleket basshysy Qasym-Jomart Toqaevtyń tóraǵalyǵymen ótken Úkimettiń keńeitilgen otyrysynda Premer-ministr Oljas Bektenov jol salasyn damytý jáne eldiń tranzittik áleýetin arttyrý baǵytynda qabyldanyp jatqan naqty sharalar týraly baiandady.
Úkimet josparyna sáikes, el aýmaǵynda 11 myń shaqyrym avtomobil jolyn salý jáne qaita jańǵyrtý kózdelip otyr. Bul sharalar ishki jáne halyqaralyq tasymaldyń tiimdiligin arttyryp qana qoimai, óńirler arasyndaǵy bailanysty nyǵaitýǵa, logistikalyq shyǵyndardy azaitýǵa múmkindik beredi.
Premer-ministrdiń aitýynsha, biyl 2,9 myń shaqyrym joldy jańǵyrtý jumystary aiaqtalady, al aldaǵy kezeńde respýblikalyq jáne jergilikti mańyzy bar avtojoldardy kezeń-kezeńimen jańalaý jalǵasady. Nátijesinde kólik aǵynynyń qaýipsizdigi artyp, jol júrý ýaqyty qysqarady.
Jol sapasy – basty nazarda
Jol qurylysy kóleminiń ulǵaiýy sapa máselesin ekinshi orynǵa ysyrýǵa sebep bolmaýy tiis. Osy turǵyda Jol aktivteri sapasynyń ulttyq ortalyǵy avtomobil joldary salasyndaǵy negizgi baqylaýshy organ retinde mańyzdy ról atqarady.
Almaty qalasy boiynsha bul jumysty Jol aktivteri sapasynyń ulttyq ortalyǵynyń qalalyq filialy júieli túrde júrgizip keledi. Filial direktory Máýlen Toqtarbaiuly Álipovtiń aitýynsha, jol sapasyn qamtamasyz etý tek sońǵy nátijeni emes, qurylys barysynyń árbir kezeńin baqylaýdy talap etedi.
«Joldyń sapasy tek paidalanýǵa berilgen sátte emes, qurylys bastalǵan kúnnen-aq qalyptasady. Sondyqtan biz jobalyq qujattamadan bastap, jol-qurylys materialdarynyń sapasyna, tóseý tehnologiiasynyń saqtalýyna deiin keshendi baqylaý júrgizemiz. Anyqtalǵan kemshilikter boiynsha merdiger uiymdarǵa mindetti túrde nusqamalar berilip, olar tolyq joiylǵanǵa deiin baqylaý jalǵasady», — deidi Máýlen Toqtarbaiuly Álipov.
Onyń aitýynsha, Almaty qalasynda joldardyń qarqyndy paidalanylýy men kólik júktemesiniń joǵary bolýy sapa talaptaryn odan ári kúsheitýdi qajet etedi. Osy sebepti filial mamandary zamanaýi zerthanalyq quraldar arqyly synaqtar júrgizip, jol jabyndarynyń beriktigi men uzaq merzimdiligin baǵalaidy.
Uzaq merzimdi nátije – qaýipsiz ári sapaly jol
Jol aktivteri sapasynyń ulttyq ortalyǵy jol salý, qaita jańǵyrtý jáne jóndeý jumystarynyń barlyq kezeńinde táýelsiz tehnikalyq baqylaý júrgizedi. Ortalyqtyń qorytyndylary memlekettik organdar úshin mańyzdy sheshim qabyldaý quralyna ainalyp otyr.
Sarapshylardyń pikirinshe, jol salasyndaǵy basty mindet — jańa joldar salýmen qatar, olardyń uzaq jyldar boiy sapaly kúide saqtalýyn qamtamasyz etý. Bul baǵytta Ulttyq ortalyqtyń qyzmeti Úkimettiń turaqty baqylaýynda.
Osylaisha, 11 myń shaqyrym avtomobil jolyn jańǵyrtý jobasy jol infraqurylymyn keńeitip qana qoimai, jol sapasyna qoiylatyn talaptardy jańa deńgeige kóterýdi kózdeidi. Al bul óz kezeginde júrgizýshilerdiń qaýipsizdigin arttyryp, el ekonomikasynyń damýyna oń serpin beredi.
