AQSh prezidentiniń arnaiy ókili Stiv Ýitkoff pen amerikalyq kelissóz júrgizýshi Djared Kýshner 12 qarashada Máskeýge keldi. Olardy áýejaidan Resei prezidentiniń arnaiy ókili Kirill Dmitriev qarsy aldy, dep habarlaidy dalanews.kz.
Amerikalyq ókilder búgin Resei prezidenti Vladimir Pýtinmen kezdesedi. Kelissózdiń birinshi kezekte ótýine bailanysty Pýtinniń kún tártibindegi ózge is-sharalar tústen keiinge aýystyrylǵan.
Máskeýge qandai usynys jetkizildi?
Ýitkoff pen Kýshner buǵan deiin Abý-Dabide ótken Resei, Ýkraina jáne AQSh ókilderiniń eki kúndik kelissózine qatysqan. Bul úsh taraptyń aqpannan bergi alǵashqy tikelei kezdesýi boldy.
Kýshnerdiń málimdeýinshe, Máskeýde Ýkraina jáne Eýropa elderimen aldyn ala kelisilgen usynystar talqylanady. Kelissózde soǵysty toqtatý joldary, Ýkrainaǵa beriletin qaýipsizdik kepildikteri, atysty doǵarýdy baqylaý jáne Eýropa ókilderin aldaǵy kezdesýlerge qatystyrý máselesi qaralýy múmkin.
AQSh ókili taraptar arasynda áli de eleýli kelispeýshilikter baryn moiyndady. Onyń sózinshe, eń kúrdeli másele aýmaqtarǵa qatysty ustanym bolyp otyr.
Abý-Dabidegi kelissóz nemen aiaqtaldy?
Abý-Dabidegi kezdesýde túpkilikti beibit kelisimge qol jetkizilgen joq. Degenmen Resei men Ýkraina aýqymdy tutqyn almasý jóninde aldyn ala ýaǵdalasty. Onyń naqty tártibi men qatysýshylar sany qosymsha kelisilmek.
Taraptar soǵystan keiingi qaýipsizdik júiesin de talqylaǵan. Keibir máseleler boiynsha ortaq túsinik qalyptasqanymen, aýmaqtyq talaptar men qaýipsizdik kepildikterine qatysty aiyrmashylyqtar saqtalyp otyr.
