Abai oblysynda bir aptaǵa jýyq ýaqyt boiy iz-túzsiz joǵalǵan 44 jastaǵy Rinat Ahmetovtiń máiiti tabyldy. Buǵan deiin onyń Lexus LX 570 avtokóligi jyradan anyqtalǵan bolatyn. Aldyn ala boljam boiynsha, er adam sýyqtan úsip qaitys bolýy múmkin, dep habarlaidy dalanews.kz.
Abai oblystyq politsiia departamentiniń málimetinshe, 1982 jyly týǵan Semei qalasynyń turǵyny Rinat Ahmetov 4 qarasha kúni úiinen shyǵyp ketken. Sodan keiin jaqyndarymen bailanysqa shyqpaǵan. Er adamnyń joǵalýyna bailanysty izdestirý jumystary bastalǵan. Izdeý barysynda onyń Lexus LX 570 markaly jol talǵamaityn kóligi Borodýliha aýdanyndaǵy jyradan tabylǵan. Alaida avtokóliktiń ishinen júrgizýshi tabylmaǵandyqtan, politsiia men qutqarýshylar izdestirý jumystaryn jalǵastyrǵan.
11 qarasha kúni saǵat 15:40 shamasynda tártip saqshylary joǵalǵan azamattyń máiitin anyqtady. Marqumnyń denesi Borodýliha aýdanyna qarasty Novovasilevka aýylynan shamamen 35 shaqyrym qashyqtyqtaǵy ashyq daladan tabylǵan.
Politsiia er adamnyń ólimine qatysty aldyn ala boljamyn jariialady.
"Aldyn ala málimet boiynsha, ólimge úsip qalý sebep bolýy múmkin. Qaitys bolýdyń naqty sebebin anyqtaý úshin sot-meditsinalyq saraptama taǵaiyndaldy", – dep habarlady politsiia.
Rinat Ahmetovti izdeýge aýqymdy kúsh jumyldyrylǵan. Izdestirý sharalaryna 60-tan astam politsiia qyzmetkeri, sonyń ishinde Abai oblystyq politsiia departamentiniń 30 arnaiy jasaq qyzmetkeri qatysqan. Sondai-aq er adamdy izdeýge Tótenshe jaǵdailar organdarynyń 10 mamany, 50 áskeri qyzmetshi, tórt erikti jáne joǵalǵan azamattyń 10 týysy men dosy atsalysqan.
Izdeý jumystaryna jergilikti turǵyndar da kómek kórsetken. Atap aitqanda, jetýi qiyn jáne jol jaǵdaiy kúrdeli aýmaqtardy tekserý úshin turǵyndardyń 12 traktory men politsiianyń eki kvadrotsikli paidalanylǵan. Qutqarýshylar men tártip saqshylary birneshe kún boiy dalalyq aýmaqtardy tekserip, joǵalǵan adamnyń júrgen jerin anyqtaýǵa tyrysqan.
