Prezident óskeleń urpaqtyń jasandy intellektini durys qoldana bilýi mańyzdy ekenin eskertti. Qasym-Jomart Toqaevtyń aitýynsha, muny elimizde júrgizilip jatqan tsifrlyq betburystyń negizgi sharty desek bolady,- dep habarlaidy Dalanews.kz
"Biz qazirdiń ózinde AI-Sana oqytý baǵdarlamasyn júzege asyryp jatyrmyz. Jobanyń maqsaty – stýdentterdiń jasandy intellekt salasyndaǵy daǵdysyn jetildirý. Bul baǵdarlamanyń aýqymyn barynsha keńeite túsken abzal. Ustazdar men oqýshylardyń jasandy intellekt salasyndaǵy bilimin jetildirý úshin júieli sharalar qabyldaý qajet. Bul – tiisti ministrliktiń aldynda turǵan mańyzdy mindet", – dedi Prezident.
Budan bólek Memleket basshysy investitsiia men daryn ielerine qolaily jaǵdai jasaýdyń mańyzyna toqtaldy.
"Byltyr jasandy intellekt salasyndaǵy startaptarǵa dúnie júzi boiynsha 100 milliard dollarǵa jýyq investitsiia salyndy. Bul álemdegi venchýrlyq qarajattyń úshten bir bóliginen asyp túsedi. 2023 jylmen salystyrǵanda JI jobalaryn qarjylandyrý shamamen 80 paiyzǵa artty. Osylaisha jasandy intellekt salasyndaǵy talanttar men ideialarǵa báseke kúrt ósti. Búginde negizgi investitsiia aǵynyn AQSh, Eýropa Odaǵy elderi jáne Qytai qamtamasyz etip otyr. Biraq bul qarjy qalyptasqan ekojúie bar jerge baǵyttalady. Iaǵni infraqurylymǵa qoljetimdilikti qamtamasyz etýge, qoldaýǵa, naryqty retteýge jáne damytýǵa jumsalady. Aqsha jaǵdai jasalǵan jerge keledi. Bir ai buryn men JI salasyndaǵy birqatar qazaqstandyq startappen tanystym. Olardyń keibiri álemdik deńgeige shyǵa alady. Daryndy jastarymyzdyń bar ekeni qýantady. Olardyń birazy shetelde jumys istese de, otanshyldyq sezimin joǵaltpaǵan. Memleket mundai talant ielerin qoldaýǵa mindetti", – dedi Qasym-Jomart Toqaev.
Prezident Úkimetke otandyq startaptardyń eksportqa shyǵýyna qoldaý kórsetý úshin keshendi sharalar ázirleý, sondai-aq, "tsifrlyq elshiler" institýtyn qaita qaraý mindetin júktedi.
"Bizdiń mindetimiz – qarym-qabileti joǵary jastarǵa qolaily innovatsiialyq ekojúie qalyptastyrý. Jalpy aitqanda, olarǵa barlyq jaǵdaidy jasaý, qol ushyn berý. Sondai-aq, tyń bastamalardy jedel júzege asyrýǵa yqpal etetin qurylymdar men zertteý ortalyqtaryn ashý kerek. Tsifrlyq tehnologiia salasyndaǵy halyqaralyq bailanystardy nyǵaita túsken jón. Sonda ǵana Qazaqstan Eýraziianyń tsifrlyq haby retinde tanylmaq. Jasandy intellektini damytý – elimiz úshin strategiialyq máni airyqsha mindet. Bul mindet Qazaqstannyń bolashaǵymen tikelei bailanysty. Elimiz mindetti túrde ozyq, damyǵan bolýy qajet. Sondyqtan bul másele meniń jeke baqylaýymda bolady. Búgingi jiynda birqatar mańyzdy mindetterdi aiqyndadyq. Barlyq memlekettik organ men mekeme birlesip jumys isteýi kerek. Bul jumysqa jeke sektor ókilderin de qosý kerek. Sebebi bul – jalpyulttyq maqsat. Tsifrlyq damý ministrligi basty úilestirýshi organ retinde ózara bailanysty qamtamasyz etýge tiis. Ýaqyt óte tyǵyz, toqmeiilsip otyrýǵa bolmaidy. Jasandy intellektige qatysty negizgi sheshimder men usynystardy eki aidyń ishinde daiyndap, maǵan kórsetý qajet", – dep qorytyndylady sózin Qasym-Jomart Toqaev.
