پرەزيدەنت وسكەلەڭ ۇرپاقتىڭ جاساندى ينتەللەكتىنى دۇرىس قولدانا ءبىلۋى ماڭىزدى ەكەنىن ەسكەرتتى. قاسىم-جومارت توقايەۆتىڭ ايتۋىنشا، مۇنى ەلىمىزدە جۇرگىزىلىپ جاتقان سيفرلىق بەتبۇرىستىڭ نەگىزگى شارتى دەسەك بولادى،- دەپ حابارلايدى Dalanews.kz
"ءبىز ءقازىردىڭ وزىندە AI-Sana وقىتۋ باعدارلاماسىن جۇزەگە اسىرىپ جاتىرمىز. جوبانىڭ ماقساتى – ستۋدەنتتەردىڭ جاساندى ينتەللەكت سالاسىنداعى داعدىسىن جەتىلدىرۋ. بۇل باعدارلامانىڭ اۋقىمىن بارىنشا كەڭەيتە تۇسكەن ابزال. ۇستازدار مەن وقۋشىلاردىڭ جاساندى ينتەللەكت سالاسىنداعى ءبىلىمىن جەتىلدىرۋ ءۇشىن جۇيەلى شارالار قابىلداۋ قاجەت. بۇل – ءتيىستى مينيسترلىكتىڭ الدىندا تۇرعان ماڭىزدى مىندەت"، – دەدى پرەزيدەنت.
بۇدان بولەك مەملەكەت باسشىسى ينۆەستيسيا مەن دارىن يەلەرىنە قولايلى جاعداي جاساۋدىڭ ماڭىزىنا توقتالدى.
"بىلتىر جاساندى ينتەللەكت سالاسىنداعى ستارتاپتارعا دۇنيە ءجۇزى بويىنشا 100 ميلليارد دوللارعا جۋىق ينۆەستيسيا سالىندى. بۇل الەمدەگى ۆەنچۋرلىق قاراجاتتىڭ ۇشتەن ءبىر بولىگىنەن اسىپ تۇسەدى. 2023 جىلمەن سالىستىرعاندا جي جوبالارىن قارجىلاندىرۋ شامامەن 80 پايىزعا ارتتى. وسىلايشا جاساندى ينتەللەكت سالاسىنداعى تالانتتار مەن يدەيالارعا باسەكە كۇرت ءوستى. بۇگىندە نەگىزگى ينۆەستيسيا اعىنىن اقش، ەۋروپا وداعى ەلدەرى جانە جۇڭگو قامتاماسىز ەتىپ وتىر. ءبىراق بۇل قارجى قالىپتاسقان ەكوجۇيە بار جەرگە باعىتتالادى. ياعني ينفراقۇرىلىمعا قولجەتىمدىلىكتى قامتاماسىز ەتۋگە، قولداۋعا، نارىقتى رەتتەۋگە جانە دامىتۋعا جۇمسالادى. اقشا جاعداي جاسالعان جەرگە كەلەدى. ءبىر اي بۇرىن مەن جي سالاسىنداعى ءبىرقاتار قازاقستاندىق ستارتاپپەن تانىستىم. ولاردىڭ كەيبىرى الەمدىك دەڭگەيگە شىعا الادى. دارىندى جاستارىمىزدىڭ بار ەكەنى قۋانتادى. ولاردىڭ ءبىرازى شەتەلدە جۇمىس ىستەسە دە، وتانشىلدىق سەزىمىن جوعالتپاعان. مەملەكەت مۇنداي تالانت يەلەرىن قولداۋعا مىندەتتى"، – دەدى قاسىم-جومارت توقايەۆ.
پرەزيدەنت ۇكىمەتكە وتاندىق ستارتاپتاردىڭ ەكسپورتقا شىعۋىنا قولداۋ كورسەتۋ ءۇشىن كەشەندى شارالار ازىرلەۋ، سونداي-اق، "سيفرلىق ەلشىلەر" ينستيتۋتىن قايتا قاراۋ مىندەتىن جۇكتەدى.
"ءبىزدىڭ مىندەتىمىز – قارىم-قابىلەتى جوعارى جاستارعا قولايلى يننوۆاسيالىق ەكوجۇيە قالىپتاستىرۋ. جالپى ايتقاندا، ولارعا بارلىق جاعدايدى جاساۋ، قول ۇشىن بەرۋ. سونداي-اق، تىڭ باستامالاردى جەدەل جۇزەگە اسىرۋعا ىقپال ەتەتىن قۇرىلىمدار مەن زەرتتەۋ ورتالىقتارىن اشۋ كەرەك. سيفرلىق تەحنولوگيا سالاسىنداعى حالىقارالىق بايلانىستاردى نىعايتا تۇسكەن ءجون. سوندا عانا قازاقستان ەۋرازيانىڭ سيفرلىق حابى رەتىندە تانىلماق. جاساندى ينتەللەكتىنى دامىتۋ – ەلىمىز ءۇشىن ستراتەگيالىق ءمانى ايرىقشا مىندەت. بۇل مىندەت قازاقستاننىڭ بولاشاعىمەن تىكەلەي بايلانىستى. ەلىمىز مىندەتتى تۇردە وزىق، دامىعان بولۋى قاجەت. سوندىقتان بۇل ماسەلە مەنىڭ جەكە باقىلاۋىمدا بولادى. بۇگىنگى جيىندا ءبىرقاتار ماڭىزدى مىندەتتەردى ايقىندادىق. بارلىق مەملەكەتتىك ورگان مەن مەكەمە بىرلەسىپ جۇمىس ىستەۋى كەرەك. بۇل جۇمىسقا جەكە سەكتور وكىلدەرىن دە قوسۋ كەرەك. سەبەبى بۇل – جالپىۇلتتىق ماقسات. سيفرلىق دامۋ مينيسترلىگى باستى ۇيلەستىرۋشى ورگان رەتىندە ءوزارا بايلانىستى قامتاماسىز ەتۋگە ءتيىس. ۋاقىت وتە تىعىز، توقمەيىلسىپ وتىرۋعا بولمايدى. جاساندى ينتەللەكتىگە قاتىستى نەگىزگى شەشىمدەر مەن ۇسىنىستاردى ەكى ايدىڭ ىشىندە دايىنداپ، ماعان كورسەتۋ قاجەت"، – دەپ قورىتىندىلادى ءسوزىن قاسىم-جومارت توقايەۆ.
