Reseilik jýrnalist Tina Kandelaki qyrǵyz halqyn da rýsofob dep atady, - dep habarlaidy Dalanews.kz.
Bári jergilikti bilik Bishkektegi Panfilov diviziiasynyń mýzeiin buzýynan bastalǵan. Artynsha Tina Kandelaki jergilikti bilik "Batys áserinen keńes tarihyn elden alastatyp, onyń ornyna rýssofobiia paida bolǵanyn" aitty.
Reseilik jýrnalistiń málimdemesine Qyrǵyzstan prezidentiniń baspasóz hatshysy Daiyrbek Orýnbekov jaýap berdi. Onyń sózinshe, birinshiden, mýzeidi buzý týraly sheshim ǵimarattyń jaǵdaiyn muqiiat taldaǵannan keiin qabyldanǵan.
"Ekinshiden, Qyrǵyzstan - egemen memleket. Biliktiń sheshimderi halyqtyń múddelerine negizdelgen. Úshinshiden, Qyrǵyzstan - orys tili men mádenieti ómirdiń ajyramas bóligi bolyp tabylatyn kópultty el.
Tórtinshiden, Panfilov diviziiasyn ulyqtaý - bul Máskeýdi qorǵaǵany úshin qaza tapqan ákelerimiz ben atalarymyzǵa degen qurmet", - deidi Orýnbekov.
Daiyrbek Orýnbekov Tina Kandelakidiń málimdemesi absýrd ekenin atap ótti.
"Tina Kandelaki mundai málimdeme jasamas buryn bizdiń elimizdiń tarihyn bilip alýǵa keńes beremiz, bizdiń elimizge kelse, onyń oiy ózgerip, mundai málimdeme jasamas edi", - deidi ol.
Eske salaiyq,Kandelaki buǵan deiin de Qyrǵyzstanda da orys tili shettetilip jatqanyn aityp, artynsha jazbasyn óshirip tastaǵan bolatyn.
Kandelakidiń sózinshe, Qyrǵyzstan biligi bir jyldan beri Bishkektegi tórt aýdannyń atyn ózgertý boiynsha jumystar júrgizip jatyr eken.
"Bishkektegi aýdandarda KSRO kezinen saqtalǵan oryssha keremet ataýlarmen atalǵan: Pervomaiskii, Oktiabrskii, Leninskii, Sverdlovskii. Qyrǵyzstandyq depýtattar bul (aýdan ataýlaryn ózgertý) "ulttyq ideologiiany nyǵaitý, sondai-aq, tarihi dástúrler men qundylyqtar negizinde azamattardyń rýhani-adamgershilik tárbiesin jaqsartý maqsatynda" dep usynyp otyr. Qyrǵyzstan halqynyń kóbi qyrǵyz tilinde emes, orys tilinde sóilese, qaidaǵy ideologiia?! Bárin qiyndatýdyń ne qajeti bar?" - deidi Tina Kandelaki jazbasynda.
Telejúrgizýshi jazbasynda dál osylai Ýkrainada dekommýnizatsiia bastalǵanyn, ol búkil orys tilinen bas tartý kompaniiasyna ainalǵanyn aitady.
Biraq Tina Kandelaki bul jazbasyn óshirip tastaǵan.
Buǵan deiin Tina Kandelaki Qazaqstanda orys tili shettetilip jatqanyn jazyp, qoǵamda qyzý talqyǵa túsken bolatyn.
Qazaqstan Respýblikasy Kólik ministrliginiń birqatar beket ataýyn ózgertý týraly sheshimin reseilik telejúrgizýshi osylai qabyldaǵan. Kandelaki mysal retinde "Ýralsk" beketiniń ataýy "Oral", al "Ýzen" beketiniń ataýy "Jańaózen" bolyp ózgergenin keltirdi.
