رەسەيلىك جۋرناليست تينا كاندەلاكي قىرعىز حالقىن دا رۋسوفوب دەپ اتادى، - دەپ حابارلايدى Dalanews.kz.
ءبارى جەرگىلىكتى بيلىك بىشكەكتەگى پانفيلوۆ ديۆيزياسىنىڭ مۋزەيىن بۇزۋىنان باستالعان. ارتىنشا تينا كاندەلاكي جەرگىلىكتى بيلىك "باتىس اسەرىنەن كەڭەس تاريحىن ەلدەن الاستاتىپ، ونىڭ ورنىنا رۋسسوفوبيا پايدا بولعانىن" ايتتى.
رەسەيلىك ءجۋرناليستىڭ مالىمدەمەسىنە قىرعىزستان پرەزيدەنتىنىڭ باسپا ءسوز حاتشىسى دايىربەك ورۋنبەكوۆ جاۋاپ بەردى. ونىڭ سوزىنشە، بىرىنشىدەن، مۋزەيدى بۇزۋ تۋرالى شەشىم عيماراتتىڭ جاعدايىن مۇقيات تالداعاننان كەيىن قابىلدانعان.
"ەكىنشىدەن، قىرعىزستان - ەگەمەن مەملەكەت. بيلىكتىڭ شەشىمدەرى حالىقتىڭ مۇددەلەرىنە نەگىزدەلگەن. ۇشىنشىدەن، قىرعىزستان - ورىس ءتىلى مەن مادەنيەتى ءومىردىڭ اجىراماس بولىگى بولىپ تابىلاتىن كوپۇلتتى ەل.
تورتىنشىدەن، پانفيلوۆ ديۆيزياسىن ۇلىقتاۋ - بۇل ماسكەۋدى قورعاعانى ءۇشىن قازا تاپقان اكەلەرىمىز بەن اتالارىمىزعا دەگەن قۇرمەت"، - دەيدى ورۋنبەكوۆ.
دايىربەك ورۋنبەكوۆ تينا كاندەلاكيدىڭ مالىمدەمەسى ابسۋرد ەكەنىن اتاپ ءوتتى.
"تينا كاندەلاكي مۇنداي مالىمدەمە جاساماس بۇرىن ءبىزدىڭ ەلىمىزدىڭ تاريحىن ءبىلىپ الۋعا كەڭەس بەرەمىز، ءبىزدىڭ ەلىمىزگە كەلسە، ونىڭ ويى وزگەرىپ، مۇنداي مالىمدەمە جاساماس ەدى"، - دەيدى ول.
ەسكە سالايىق،كاندەلاكي بۇعان دەيىن دە قىرعىزستاندا دا ورىس ءتىلى شەتتەتىلىپ جاتقانىن ايتىپ، ارتىنشا جازباسىن ءوشىرىپ تاستاعان بولاتىن.
كاندەلاكيدىڭ سوزىنشە، قىرعىزستان بيلىگى ءبىر جىلدان بەرى بىشكەكتەگى ءتورت اۋداننىڭ اتىن وزگەرتۋ بويىنشا جۇمىستار جۇرگىزىپ جاتىر ەكەن.
"بىشكەكتەگى اۋدانداردا كسرو كەزىنەن ساقتالعان ورىسشا كەرەمەت اتاۋلارمەن اتالعان: پەرۆومايسكيي، وكتيابرسكيي، لەنينسكيي، سۆەردلوۆسكيي. قىرعىزستاندىق دەپۋتاتتار بۇل (اۋدان اتاۋلارىن وزگەرتۋ) "ۇلتتىق يدەولوگيانى نىعايتۋ، سونداي-اق، تاريحي داستۇرلەر مەن قۇندىلىقتار نەگىزىندە ازاماتتاردىڭ رۋحاني-ادامگەرشىلىك تاربيەسىن جاقسارتۋ ماقساتىندا" دەپ ۇسىنىپ وتىر. قىرعىزستان حالقىنىڭ كوبى قىرعىز تىلىندە ەمەس، ورىس تىلىندە سويلەسە، قايداعى يدەولوگيا؟! ءبارىن قيىنداتۋدىڭ نە قاجەتى بار؟" - دەيدى تينا كاندەلاكي جازباسىندا.
تەلەجۇرگىزۋشى جازباسىندا ءدال وسىلاي ۋكراينادا دەكوممۋنيزاسيا باستالعانىن، ول بۇكىل ورىس تىلىنەن باس تارتۋ كومپانياسىنا اينالعانىن ايتادى.
ءبىراق تينا كاندەلاكي بۇل جازباسىن ءوشىرىپ تاستاعان.
بۇعان دەيىن تينا كاندەلاكي قازاقستاندا ورىس ءتىلى شەتتەتىلىپ جاتقانىن جازىپ، قوعامدا قىزۋ تالقىعا تۇسكەن بولاتىن.
قازاقستان رەسپۋبليكاسى كولىك مينيسترلىگىنىڭ ءبىرقاتار بەكەت اتاۋىن وزگەرتۋ تۋرالى شەشىمىن رەسەيلىك تەلەجۇرگىزۋشى وسىلاي قابىلداعان. كاندەلاكي مىسال رەتىندە "ۋرالسك" بەكەتىنىڭ اتاۋى "ورال"، ال "ۋزەن" بەكەتىنىڭ اتاۋى "جاڭاوزەن" بولىپ وزگەرگەنىن كەلتىردى.
