16 qazanda «Han-Táńiri» klýbynyń 19 jastaǵy fýtbolshysy Dias Tóleý oiyn kezinde kóz jumdy degen sýyq habar tarady. Jýrnalist Gúlbaný Ábenova sportshyǵa tiisti deńgeide meditsinalyq kómek kórsetilmegen bolýy múmkin dep esepteidi, dep habarlaid Dalanews.kz.
Jýrnalist 19 jastaǵy Dias Tóleýdiń ólimi – eskerýsiz qaldyrýǵa bolmaityn dabyl ekenin atap ótti.
"Biz fýtboldyń damýy, akademiialar, jas juldyzdar týraly jii aitamyz. Biraq oiynshylardyń densaýlyǵy jaily – úndemeimiz. Jasóspirimder jaraqatpen oinaidy, sharshaǵan kúide jattyǵady,
dene berip turǵan eskertý belgilerine mán bermeidi", - deidi jýrnalist.
Tekserý bar, biraq ol - qaǵaz júzindegi formaldylyq. Al adam aǵzasy únsiz eskertý beredi, biraq ony eshkim tyńdamaidy.
"Dańq pen marapatqa soqyr umtylys. Jaqynda ǵana 18 jastaǵy Sherhandy aspanǵa kóterdik - marapat, madaq, maqtaý. Al eldegi basqa júzdegen jas fýtbolshy endi sol dańqqa jetýdi armandaidy. Syilyq pen maqtaý úshin, olar óz densaýlyǵyn umytady, aǵzanyń álsizdigin elemeidi, aýrýdy sezse de, úndemei shydaidy. Olja úshin", - deidi Ábenova.
Jýrnalist Dias ta sol soqyr umtylystyń qurbany bolýy múmkin ekenin aitady. Ol alańǵa shyqqannan keiin týra bir saǵattan soń kóz jumdy.
"Múmkin, bul - aǵzanyń sońǵy shegi edi. Jattyǵý kezinde de onyń jaǵdaiyna eshkim mán bermegen shyǵar. Aldyn alý júiesi qaida? Nege sportshylar tolyq meditsinalyq tekserýden ótpeidi? Nege klýbtar men federatsiialar olardyń jaǵdaiyn baqylamaidy? Nege jas oiynshylar kardiobaqylaýsyz, dárigersiz, sharshaýǵa mán bermei jattyǵady?", - deidi ol.
Ábenovanyń sózinshe, Eýropada mundai oqiǵalar sirek, sebebi júie jumys isteidi.
"Jaýapkershilikti kim kóteredi? Fýtbol federatsiiasy komissiia qurmaq. Biraq mundai komissiialar ár ólimnen keiin qurylady – jáne jańalyqtar basylǵan soń birge umytylady", - deidi ol.
Jýrnalist klýbtar men mektepter, bapkerler men dárigerler jaýap berýi kerek dep esepteidi:
Nege jas fýtbolshy alańda kóz jumdy?
Onyń jaǵdaiyn kim baqylap otyrdy?
Meditsinalyq tekserýden ótti me?
Jattyǵý jaǵdaiy qandai boldy?
Ne ózgerýi kerek?
1. Tolyq, turaqty meditsinalyq tekserý men kardiobaqylaý.
2. Aǵzasy daiyn emes oiynshylardy alańǵa shyǵarýǵa tyiym.
3. Naǵyz meditsinalyq qyzmet ár matchta bolýy kerek.
4. Bapkerler men klýbtardyń jaýapkershiligin arttyrý.
5. Jas sportshylardy aǵzany tyńdaýǵa úiretý.
"Dias Tóleý fýtbolmen ómir súrgen myńdaǵan jas jigittiń biri edi. Biraq onyń ólimi - jai ǵana qaiǵy emes, nátijeni adam ómirinen joǵary qoiǵan júieniń saldary. Eshqandai kýbok, eshqandai marapat, eshqandai ataq - bir adamnyń júreginen qymbat emes. Dias Tóleý endi alańǵa shyqpaidy. Biraq onyń qazasy – sport ómir úshin qaýipti bolmaýy tiis degen shekara bolýy kerek. Sebebi eshbir jeńis adam ómirinen qymbat emes", - deidi jýrnalist.
Ábenova Diastyń ata-anasyna, jaqyndaryna jáne komandasyna kóńil aitty.
