Májilis depýtaty Ashat Aimaǵambetov azamattardyń áleýmettik quqyqtaryn qorǵaýǵa baǵyttalǵan jańa túzetýler týraly aitty, dep habarlaidy dalanews.kz.
Depýtattyń sózinshe, buǵan deiin ol avtomatty túrde qaita-qaita qońyraý shalý, iaǵni avtodozvon máselesin ministrdiń aldynda kóterip, zańǵa tiisti ózgeris engizýdi usynǵan. Endi bul bastama naqty nátije bere bastaǵan.
Aimaǵambetov Tsifrlyq damý, innovatsiialar jáne aeroǵarysh ónerkásibi ministrliginen kelgen resmi jaýap hatty jariialap, Bailanys qyzmetterin kórsetý qaǵidalaryna ózgerister engizilip jatqanyn habarlady.
Jańa tártipke sáikes, abonentti qabyldanbaǵan qońyraýlar týraly habardar etý tek SMS arqyly júzege asyrylmaq. Iaǵni azamattardy mazalaityn avtomatty qońyraýlarǵa shekteý qoiylady.
Sonymen qatar zań jobasy aiasynda ruqsat etilmegen trafikti generatsiialaýǵa tyiym salatyn arnaiy túzetýler de qarastyrylyp jatyr.
Depýtattyń aitýynsha, halyqty jii mazalaityn, spamǵa ainalǵan zańsyz qońyraýlarǵa quqyqtyq turǵydan naqty tosqaýyl qoiý mańyzdy. Bul ózgerister azamattardyń tynyshtyǵyn qorǵaýǵa jáne bailanys qyzmetterindegi tártipti kúsheitýge baǵyttalǵan.
