Túrkistan oblysyn qurý jáne oblys ortalyǵyn Túrkistan qalasyna kóshirý týraly Elbasynyń Jarlyǵyn túrkistandyqtar qýanyshpen qabyldap, el bolyp merekelep atap ótti.
Saltanatty jiynǵa oblys ákimi Janseiit Túimebaev, oblystyq máslihat hatshysy Qairat Balabiev, «Nur Otan» partiiasynyń oblystyq filialy tóraǵasynyń birinshi orynbasary Nurmahan Joldasov, oblystyq máslihattyń depýtattary, oblys el aǵalary men ziialy qaýym ókilderi qatysty.
Merekelik jiynda sóz sóilegen aimaq basshysy ejelden qazaq handyǵynyń ortalyǵy, kúlli túrki jurtynyń rýhani ordasy, mádeni astanasy atanǵan qut mekenniń oblys ortalyǵyna ainalýynyń mán-maǵynasyna toqtaldy.
«Sizderdi kóne shahar Túrkistannyń oblys ortalyǵy mártebesin iemdengen tarihi sátimen shyn júrekten quttyqtaimyn! Elbasymyz atap kórsetkendei óńirdiń órkendeýine tyń serpin berýin kózdegen sheshimniń tarihi mán-maǵynasy óte tereńde.
Bul qadam kóne shahardyń qoinaýynda jatqan tarihi jádigerlerdiń qaita jarqyrap, óńirdiń áleýmettik-ekonomikalyq áleýetiniń kóterilýine, jergilikti turǵyndardyń turmys sapasynyń artýyna oń yqpal jasaityny sózsiz.
1500 jyldan astam tarihy bar jádiger qalanyń HHI ǵasyrdaǵy jańa tynysy ashylǵaly tur»
– dedi Janseiit Qanseiituly.
Sondai-aq, óńir basshysy Elbasy airyqsha yqylas pen qurmet tanytyp, Túrkistandy túletýge erekshe mán berip kelgenin atap ótti. Máselen, Elbasynyń tikelei yqpalymen 1991 jyly Túrkistanda Q.A.Iasaýi atyndaǵy halyqaralyq qazaq-túrik ýniversiteti quryldy. Bul bastama qalamyzdyń túrki dúniesindegi ornyn taǵy bir aishyqtai tústi.
Sonymen qatar, 1998 jyldan bastap Túrkistannyń 1500 jyldyq mereitoiyna arnalǵan daiyndyq sharalaryna ulasty. Atap aitqanda, 2000 jyly IýNESKO-nyń sheshimimen Túrkistan kalasynyń 1500 jyldyq mereitoiy álemdik deńgeide atalyp ótýi de tarihi qalanyń damýyndaǵy aitýly kezeń boldy.
2002 jyly Dúniejúzi Qazaqtarynyń II-shi Quryltaiy da osynda ótti. Bul quryltaida oralmandardyń elge oralý máselesi qaralyp, kóshi-qon kvotasynyń mólsherin ulǵaitý jospary qarastyryldy.
Túrkistan elimizdiń Qyzylorda, Qaraǵandy, Aqtóbe, Atyraý, Mańǵystaý oblystary úshin saýda sattyq ortalyǵy bolsa, sondai-aq, qala «Batys Eýropa - Batys Qytai» halyqaralyq tranzittik dálizinde ornalasqan jáne bir jaǵynan Qytaiǵa, ekinshi jaǵynan Reseige qatynaityn temir jol toraby da bar.
Tamyry tereńge tartqan qut meken – Túrkistan 2017 jyly TÚRKSOI uiymynyń sheshimimen túrki áleminiń mádeni astanasy atanyp, osy jyl kóleminde qalada baýyrlas halyqtardyń birligi men mádenietin pash etetin túrli mádeni sharalar uiymdastyryldy.
Saltanatty sharanyń sońy Qazaqstan estrada juldyzdarynyń kontserttik baǵdarlamasyna ulasty.
