Búgin Ońtústik Qazaqstan oblysynyń ákimi Janseiit Túimebaev pen qala ákimi Nurlan Saýranbaev Shymkent qalasynyń 1 millionynshy turǵyny dúniege kelgen Elamanovtar otbasyn quttyqtap, jas otbasyǵa 2 bólmeli páterdiń kiltin tabys etti.
Búgin 22 jastaǵy jas otbasynyń birinshi perzenti Elamanova Aisulý millionynshy turǵyn atanyp otyr. Náresteniń ata-anasy mundai tarihi sát bizdiń otbasymyzǵa buiyrǵanyna qýanyshty ekenderin jetkizip, elimizdiń damýyna óz úlesin qosatyn bilikti azamatsha etip tárbieleýge bar kúsh-jigerlerin jumsaityndaryn aitýda.
Elbasymyz Nursultan Ábishuly Nazarbaevtyń bastamasymen birneshe jyl buryn Shymqalany million turǵyny bar ortalyqqa ainaldyrý bastamasy kóterilgenin aitqan aimaq basshysy sol maqsat júzege asyp, Shymkent elimizdegi milliondyq halqy bar úsh qalanyń birine ainalyp otyrǵanyn atap ótti.
«Buryn milliondyq turǵyny bar Almaty ǵana bolsa, qazir million turǵyny bar eki qala - Astana men Shymkent. Astana ótken jyldary milliondyq qala atansa, Shymkent biyl milliondyq halqy bar qalaǵa ainalyp otyr. Elbasy búkil dúnie júziniń qairatkerler qatysqan ekonomikalyq forýmda Shymkent qalasyn milliondy qala dep jariialady. Al shymkenttikter respýblikalyq statýs ielený bastamasyn óte qyzý qarqynmen qoldady. 2017 jyldyń qorytyndysyna sáikes oblys ortalyǵynyń turǵyndary 39 myń adamǵa ósti. Munyń 18 myńy ishki kóshi-qon esebinen júzege asqan.
Al qalanyń millionynshy turǵyny mamyr aiynda dúniege kelgen bolatyn. Ol azamatsha ózderińiz kórip otyrǵan Elamanova Aisulý jas otbasynyń birinshi perzenti.
Shymkenttikterdiń atynan osy aitýly oqiǵamen shyn júrekten quttyqtaimyn. Kishkentai náreste deni saý, eline eleýli, halqyna qalaýly qyz bolyp ósip, eldiń naǵyz patriot azamatshasy bolsyn!»,-dedi oblys ákimi.
Aisulýdyń ata-anasy Elamanov Samat pen Ahaibekova Aijan ózderine kórsetilip jatqan úlken qurmet pen syi úshin oblys basshylyǵyna rizashylyǵyn bildirdi.
Sábidiń anasy Ahaibekova Aijan Hamitqyzy – 1996 jyly Shymkent qalasynda dúniege kelgen. Otbasynda eki qyz tárbielenip ósken. Shymkent qalasyndaǵy Alfa bankte menedjer bolsa, ákesi Elamanov Samat Talǵatuly – Saraǵash aýdany, Abai aýylynda 1995 jyly týylǵan. Qazirgi tańda, Shymkent qalasynyń júike aýrýlar aýrýhanasynda jumys isteidi.
