بۇگىن وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ پەن قالا اكىمى نۇرلان ساۋرانبايەۆ شىمكەنت قالاسىنىڭ 1 ميلليونىنشى تۇرعىنى دۇنيەگە كەلگەن ەلامانوۆتار وتباسىن قۇتتىقتاپ، جاس وتباسىعا 2 بولمەلى پاتەردىڭ كىلتىن تابىس ەتتى.
بۇگىن 22 جاستاعى جاس وتباسىنىڭ ءبىرىنشى پەرزەنتى ەلامانوۆا ايسۇلۋ ميلليونىنشى تۇرعىن اتانىپ وتىر. نارەستەنىڭ اتا-اناسى مۇنداي تاريحي ءسات ءبىزدىڭ وتباسىمىزعا بۇيىرعانىنا قۋانىشتى ەكەندەرىن جەتكىزىپ، ەلىمىزدىڭ دامۋىنا ءوز ۇلەسىن قوساتىن بىلىكتى ازاماتشا ەتىپ تاربيەلەۋگە بار كۇش-جىگەرلەرىن جۇمسايتىندارىن ايتۋدا.
ەلباسىمىز نۇرسۇلتان ءابىش ۇلى نازاربايەۆتىڭ باستاماسىمەن بىرنەشە جىل بۇرىن شىمقالانى ميلليون تۇرعىنى بار ورتالىققا اينالدىرۋ باستاماسى كوتەرىلگەنىن ايتقان ايماق باسشىسى سول ماقسات جۇزەگە اسىپ، شىمكەنت ەلىمىزدەگى ميلليوندىق حالقى بار ءۇش قالانىڭ بىرىنە اينالىپ وتىرعانىن اتاپ ءوتتى.
«بۇرىن ميلليوندىق تۇرعىنى بار الماتى عانا بولسا، ءقازىر ميلليون تۇرعىنى بار ەكى قالا - استانا مەن شىمكەنت. استانا وتكەن جىلدارى ميلليوندىق قالا اتانسا، شىمكەنت بيىل ميلليوندىق حالقى بار قالاعا اينالىپ وتىر. ەلباسى بۇكىل دۇنيە ءجۇزىنىڭ قايراتكەرلەر قاتىسقان ەكونوميكالىق فورۋمدا شىمكەنت قالاسىن ميلليوندى قالا دەپ جاريالادى. ال شىمكەنتتىكتەر رەسپۋبليكالىق ستاتۋس يەلەنۋ باستاماسىن وتە قىزۋ قارقىنمەن قولدادى. 2017 جىلدىڭ قورىتىندىسىنا سايكەس وبلىس ورتالىعىنىڭ تۇرعىندارى 39 مىڭ ادامعا ءوستى. مۇنىڭ 18 مىڭى ىشكى كوشى-قون ەسەبىنەن جۇزەگە اسقان.
ال قالانىڭ ميلليونىنشى تۇرعىنى مامىر ايىندا دۇنيەگە كەلگەن بولاتىن. ول ازاماتشا وزدەرىڭىز كورىپ وتىرعان ەلامانوۆا ايسۇلۋ جاس وتباسىنىڭ ءبىرىنشى پەرزەنتى.
شىمكەنتتىكتەردىڭ اتىنان وسى ايتۋلى وقيعامەن شىن جۇرەكتەن قۇتتىقتايمىن. كىشكەنتاي نارەستە دەنى ساۋ، ەلىنە ەلەۋلى، حالقىنا قالاۋلى قىز بولىپ ءوسىپ، ەلدىڭ ناعىز پاتريوت ازاماتشاسى بولسىن!»،-دەدى وبلىس اكىمى.
ايسۇلۋدىڭ اتا-اناسى ەلامانوۆ سامات پەن احايبەكوۆا ايجان وزدەرىنە كورسەتىلىپ جاتقان ۇلكەن قۇرمەت پەن سىي ءۇشىن وبلىس باسشىلىعىنا ريزاشىلىعىن ءبىلدىردى.
ءسابيدىڭ اناسى احايبەكوۆا ايجان حاميت قىزى – 1996 جىلى شىمكەنت قالاسىندا دۇنيەگە كەلگەن. وتباسىندا ەكى قىز تاربيەلەنىپ وسكەن. شىمكەنت قالاسىنداعى الفا بانكتە مەنەدجەر بولسا، اكەسى ەلامانوۆ سامات تالعات ۇلى – ساراعاش اۋدانى، اباي اۋىلىندا 1995 جىلى تۋىلعان. قازىرگى تاڭدا، شىمكەنت قالاسىنىڭ جۇيكە اۋرۋلار اۋرۋحاناسىندا جۇمىس ىستەيدى.
