Týrizm ortalyǵynyń jumysy kóńil qýantady
Týrizm túsinigine dendep enetin bolsańyz eresekter jáne balalar men jasóspirimder týrizmi degen de uǵym bar. Óz kezeginde týrizmniń balalarǵa arnalǵan túrin damytý alǵashqysyna qaraǵanda jaýapty, ári áldeqaida kúrdeli. Óitkeni, balalar týrizmi jetkinshek urpaqtardy, elimizdiń erteńin estetikalyq tárbieleý men qalyptastyrý isinde airyqsha oryn alady. Osy oraida kókeidi oblys pen aýdandardaǵy balalar týrizmi qai deńgeide damyp jatyr degen syndy saýaldardyń torlaityny anyq. Sonymen birge, jasóspirimderdiń týrizmin órkendetýdiń jaiy da qazir kópshilikti qyzyqtyratyn bolǵan.
Qazir elimizde tikelei balalar týrizmin damytýǵa arnalǵan ortalyqtardyń sany qyryqtyń o jaq, bu jaǵy desek, onyń jartysyna jýyǵy Batys Qazaqstan oblysyna tiesili eken. Al Jambyl oblysy boiynsha bundai ortalyqtardyń sany saýsaqpen sanarlyq qana. Solardyń biri – oblys boiynsha alǵashqy bolyp ashylǵan Shý aýdanyndaǵy Balalar-jasóspirimder týrizm jáne ólketaný ortalyǵy. Ortalyqqa qabyldanǵan árbir búldirshin atqa minýdi, balyq aýlaý men ormanda adasyp ketpeýdiń joldaryn, sýda júzýdi jáne taýǵa joryqqa shyǵýdy meńgeredi. Iaǵni qaýipsizdik erejelerimen qatar, kúrdeli jaǵdaida ne isteý kerektigin de úirenedi. Ortalyq direktory Rahiia Kóbegenovanyń aitýynsha, atalmysh mekeme 2015 jyldyń qazan aiynda ashylǵan eken.
– Balalarǵa arnalǵan týrizm ortalyǵynyń negizgi mindeti – oqýshylardyń bos ýaqytyn tiimdi paidalana otyryp, olarǵa ólketaný jáne týrizm baǵytynda qosymsha bilim berý bolyp tabylady. Búgingi tańda ortalyqqa qarasty ártúrli baǵytta «Jas týrist», «Jas ólketanýshy», «Gid» syndy 17 úiirme jumys jasaidy. Oqýshylar munda týrizm salasy boiynsha bilimderin jetildirip, aýdandaǵy mádeni eskertkishter týraly barlyq aqparatqa qanyq bola alady. Ortalyqtyń uiymdastyrýymen araǵa apta salyp aýdannyń kieli jerlerine saiahat jasap otyramyz. Mine, osyndai saparlarda bizde bilim alǵan jas ekskýrsovodtar ózderi qatarly oqýshylarǵa jol siltep, ár eskertkish týraly tolyq málimet berip otyrady. Sonymen qatar, týristik maýsymnyń jabylýyna orai aýdandyq týriadalar ótkizýdi de nazardan tys qaldyrǵan emespiz, - deidi ortalyq direktory.
Jambyl oblysy
Shý aýdany
