اۋليەاتا وڭىرىندە تۋريزم جىل ساناپ قارقىندى تۇردە دامىپ كەلە جاتىر. جالپى، تۋريزم تۋريستەردى كوپتەپ تارتۋدىڭ عانا ەمەس كوپتەگەن ەكونوميكالىق جانە الەۋمەتتىك اسپەكتىلەردى قۇرايتىن سالا. سوڭعى ونجىلدىقتا اتالمىش سالا الەم بويىنشا مىقتى دەربەس يندۋسترياعا اينالدى. دۇنيەجۇزىلىك تۋريستىك ۇيىمنىڭ مالىمەتتەرىنە سەنسەك، ول الەمنىڭ وندىرىستىك-سەرۆيستىك نارىق اينالىمىنىڭ 10 پايىزىن قامتاماسىز ەتەدى ەكەن. دالىرەك ايتقاندا، تۋريزم سالاسىنىڭ ەنشىسىنە الەم بويىنشا اينالىمداعى ونىمدەردىڭ 6 پايىزى، الەمدىك ينۆەستيسيانىڭ 7 پايىزى جانە ءاربىر  16-شى جۇمىس ورنى تيەسىلى. وعان قوسا الەمدىك تۇتىنۋشى شىعىندارىنىڭ پايىزى، بارلىق سالىق ءتۇسىمىنىڭ 5 پايىزى ءدال وسى تۋريستەردىڭ ەسەبىنەن كەلەتىن كورىنەدى. اتالعان ساندىق كورسەتكىشتەر تۋريزم يندۋسترياسىنىڭ ەكونوميكاداعى ءرولىنىڭ زور ەكەندىگىن انىق اڭعارتىپ تۇر.

تۋريزم تۇسىنىگىنە دەندەپ ەنەتىن بولساڭىز ەرەسەكتەر جانە بالالار مەن جاسوسپىرىمدەر ءتۋريزمى دەگەن دە ۇعىم بار. ءوز كەزەگىندە  ءتۋريزمنىڭ بالالارعا ارنالعان ءتۇرىن دامىتۋ العاشقىسىنا قاراعاندا جاۋاپتى، ءارى الدەقايدا كۇردەلى. ويتكەنى، بالالار ءتۋريزمى جەتكىنشەك ۇرپاقتاردى، ەلىمىزدىڭ ەرتەڭىن ەستەتيكالىق تاربيەلەۋ مەن قالىپتاستىرۋ ىسىندە ايرىقشا ورىن الادى. وسى ورايدا كوكەيدى وبلىس پەن اۋداندارداعى بالالار ءتۋريزمى قاي دەڭگەيدە دامىپ جاتىر دەگەن سىندى ساۋالداردىڭ تورلايتىنى انىق. سونىمەن بىرگە، جاسوسپىرىمدەردىڭ ءتۋريزمىن وركەندەتۋدىڭ جايى دا ءقازىر كوپشىلىكتى قىزىقتىراتىن بولعان.

ءقازىر ەلىمىزدە تىكەلەي بالالار  ءتۋريزمىن دامىتۋعا ارنالعان ورتالىقتاردىڭ سانى قىرىقتىڭ و جاق، بۇ جاعى دەسەك، ونىڭ جارتىسىنا جۋىعى باتىس قازاقستان وبلىسىنا تيەسىلى ەكەن. ال جامبىل وبلىسى بويىنشا بۇنداي ورتالىقتاردىڭ سانى ساۋساقپەن سانارلىق قانا. سولاردىڭ ءبىرى – وبلىس بويىنشا العاشقى بولىپ اشىلعان شۋ اۋدانىنداعى بالالار-جاسوسپىرىمدەر تۋريزم جانە ولكەتانۋ ورتالىعى. ورتالىققا قابىلدانعان ءاربىر ءبۇلدىرشىن اتقا ءمىنۋدى، بالىق اۋلاۋ مەن ورماندا اداسىپ كەتپەۋدىڭ جولدارىن، سۋدا ءجۇزۋدى جانە تاۋعا جورىققا شىعۋدى مەڭگەرەدى. ياعني قاۋىپسىزدىك ەرەجەلەرىمەن قاتار، كۇردەلى جاعدايدا نە ىستەۋ كەرەكتىگىن دە ۇيرەنەدى. ورتالىق ديرەكتورى راحيا كوبەگەنوۆانىڭ ايتۋىنشا، اتالمىش مەكەمە 2015 جىلدىڭ قازان ايىندا اشىلعان ەكەن.

– بالالارعا ارنالعان تۋريزم ورتالىعىنىڭ نەگىزگى مىندەتى – وقۋشىلاردىڭ بوس ۋاقىتىن ءتيىمدى پايدالانا وتىرىپ، ولارعا ولكەتانۋ جانە تۋريزم باعىتىندا قوسىمشا ءبىلىم بەرۋ بولىپ تابىلادى. بۇگىنگى تاڭدا ورتالىققا قاراستى ءارتۇرلى باعىتتا «جاس تۋريست»، «جاس ولكەتانۋشى»، «گيد» سىندى 17 ۇيىرمە جۇمىس جاسايدى. وقۋشىلار مۇندا تۋريزم سالاسى بويىنشا بىلىمدەرىن جەتىلدىرىپ، اۋدانداعى مادەني ەسكەرتكىشتەر تۋرالى بارلىق اقپاراتقا قانىق بولا الادى. ورتالىقتىڭ ۇيىمداستىرۋىمەن اراعا اپتا سالىپ اۋداننىڭ كيەلى جەرلەرىنە ساياحات جاساپ وتىرامىز. مىنە، وسىنداي ساپارلاردا بىزدە ءبىلىم العان جاس ەكسكۋرسوۆودتار وزدەرى قاتارلى وقۋشىلارعا جول سىلتەپ، ءار ەسكەرتكىش تۋرالى تولىق مالىمەت بەرىپ وتىرادى. سونىمەن قاتار، تۋريستىك ماۋسىمنىڭ جابىلۋىنا وراي اۋداندىق تۋريادالار وتكىزۋدى دە نازاردان تىس قالدىرعان ەمەسپىز، - دەيدى ورتالىق ديرەكتورى.

 

جامبىل وبلىسى

شۋ اۋدانى