Tanymal kompozitor Qaldybek Qurmanáli Bilgen durys YouTube-arnasyna bergen suhbatynda úlken aqsha úshin jat aǵymǵa satylǵandar kimder ekenin, Zamanbek Nurqadilovtiń qupiiaǵa toly hattary týraly jáne Arystanbek Muhamediuly shyn máninde qandai adam ekenin aitty, - dep habarlaidy Dalanews.kz.
Onyń sózinshe, kezinde ózin de jat aǵym jolyna tartqysy kelgender bolǵan. Esesine ájeptáýir aqsha usynypty.
"Ózimdi de tartpaqshy boldy. Almatyda páter jaldap, qinalyp júrgen kezimde úlken aqsha usyndy. Arymnyń aldynda uialatynymdy bildim. Bekbolat Tileýhanov óz salasynda biikke shyqqan. Muhamedjan Tazabekov aitystyń biigine shyqqan. Keremet azamattardyń bári aqshadan qinalyp júrgen kezder boldy. Úii joq, Almatydan páter jaldap turdy. Men kórgen qiyndyqty olar da kórdi. Sol qiyndyqqa shydai almai, ..."onda turǵan ne bar, bul da din ǵoi, Islam dinin nasihattap jatyrmyz ǵoi" dep, salafitter memleketke qaýip tóndiretinin, durys emestigin bilmedi", - deidi ol.
Qaldybek Qurmanáli osy tusta Bekbolat Tileýhandy ashyq aiyptady.
"Bekbolat Tileýhan jat aǵym jeteginde júr. Ol dinniń basqa aǵymy ǵoi. Onyń alyp kelip otyrǵany - dinniń basqa aǵymy. Onyń dini ustanymyn qoldamaimyn. Meni qatelesip otyr dep aitýy múmkin. Ótkende Quran ustap otyr. Qandai arzan qoiylym?!" - deidi kompozitor.
Sondai-aq, ol Zamanbek Nurqadilov óler aldynda hat jazyp ketken adamdar áli kúnge aramyzda júrgenin jetkizdi.
"Óler aldynda Zamanbek Nurqadilovtiń tórt papkasy boldy. Ishinde qujattary bar. Sonyń úsheýi maǵan berildi.
Zamanbek Nurqadilov "Qaldybekke ber" dep úsh hat berip ketken. Bireýi Asanáli Áshimovke. Bireýi Amalbek Tshanovqa. Ekeýi de tiri. Úshinshisi Muhtar Shahanovqa.
Qara flomastermen jazǵan. Qaitys bolǵannan keiin qolyma tidi. Ekeýi ózi aldy. Shahanov maǵan "ishinde ne jazylǵanyn oqy" dedi. "Joq, ózińiz oqy" dedim.
Úsh hat, úsh adamǵa berildi. Ne jazylǵanyn úsh adam biledi", - deidi ol.
Kompozitor Nurqadilovtiń sheteldegi qundy qujattarynyń da shet jaǵasyn aitty.
"Shetelde bir jerde úlken qujat jatqan siiaqty. Nurqadilov bir jerge qujat qoiǵan. Búkil qylmysty ashatyn aiǵaqtar bolsa kerek.
...Arystan júrekti Nurqadilovti atty. Bilik atty.
Nurqadilovtiń "biliktiń ár kezde bir oǵy artyq turady" deitin sózi bolatyn. Qajet emes adamdy oiynnan shyǵaryp jiberý úshin qoldanylatyn qarý bolady. Sol qarý Zákeńniń ózine tiip ketti", - dedi Qaldybek Qurmanáli.
Kompozitordyń sózinshe, sotty bolǵan sheneýnik Muhamediuly - jaqsy azamat, al istegen isi júieniń kesiri-mys.
"Arystanbek Muhamediulynyń jeke kinási emes. Ol - júieniń qateligi.
On bir jylǵa sottady ǵoi, túrmeden shyqsa, qarsy alyp, birge júrýge qýanar edim. Jaqsy azamat.
Onyń istegen áreketi óziniń áreketi emes qoi. Memlekettik júiede jeýge, qol salýǵa múmkindik berip tur ǵoi. Ministrlerge, ministrlerdiń orynbasarlaryna, memlekettik qyzmetkerlerge memlekettiń qarjysyna qol salmaýǵa jaǵdai jasap qoisa, jasamaidy ǵoi eshkim", - deidi ol.
Aita keteiik, jaqynda ǵana sot úkimimen Arystanbek Muhamediuly asa iri mólsherde para berýge oqtalǵany úshin kináli dep tanylyp, Qylmystyq kodekstiń 58-babynyń 3 jáne 6-bólikteri negizinde qylmystyq quqyqbuzýshylyqtar jiyntyǵy boiynsha ómir boiyna memlekettik qyzmette laýazymdardy atqarýǵa tyiym salyna otyryp, 11 jylǵa bas bostandyǵynan aiyrylǵan edi.
