تانىمال كومپوزيتور قالدىبەك ءقۇرمانالى Bilgen durys YouTube-ارناسىنا بەرگەن سۇحباتىندا ۇلكەن اقشا ءۇشىن جات اعىمعا ساتىلعاندار كىمدەر ەكەنىن، زامانبەك ءنۇرقادىلوۆتىڭ قۇپياعا تولى حاتتارى تۋرالى جانە ارىستانبەك مۇحامەدي ۇلى شىن مانىندە قانداي ادام ەكەنىن ايتتى، - دەپ حابارلايدى Dalanews.kz.

ونىڭ سوزىنشە، كەزىندە ءوزىن دە جات اعىم جولىنا تارتقىسى كەلگەندەر بولعان. ەسەسىنە اجەپتاۋىر اقشا ۇسىنىپتى.

"ءوزىمدى دە تارتپاقشى بولدى. الماتىدا پاتەر جالداپ، قينالىپ جۇرگەن كەزىمدە ۇلكەن اقشا ۇسىندى. ارىمنىڭ الدىندا ۇيالاتىنىمدى ءبىلدىم. بەكبولات تىلەۋحانوۆ ءوز سالاسىندا بيىككە شىققان. مۇحامەدجان تازابەكوۆ ايتىستىڭ بيىگىنە شىققان. كەرەمەت ازاماتتاردىڭ ءبارى اقشادان قينالىپ جۇرگەن كەزدەر بولدى. ءۇيى جوق، الماتىدان پاتەر جالداپ تۇردى. مەن كورگەن قيىندىقتى ولار دا كوردى. سول قيىندىققا شىداي الماي، ..."وندا تۇرعان نە بار، بۇل دا ءدىن عوي، يسلام ءدىنىن ناسيحاتتاپ جاتىرمىز عوي" دەپ، سالافيتتەر مەملەكەتكە ءقاۋىپ توندىرەتىنىن، دۇرىس ەمەستىگىن بىلمەدى"، - دەيدى ول.

قالدىبەك ءقۇرمانالى وسى تۇستا بەكبولات تىلەۋحاندى اشىق ايىپتادى.

"بەكبولات تىلەۋحان جات اعىم جەتەگىندە ءجۇر. ول ءدىننىڭ باسقا اعىمى عوي. ونىڭ الىپ كەلىپ وتىرعانى - ءدىننىڭ باسقا اعىمى. ونىڭ ءدىني ۇستانىمىن قولدامايمىن. مەنى قاتەلەسىپ وتىر دەپ ايتۋى مۇمكىن. وتكەندە قۇران ۇستاپ وتىر. قانداي ارزان قويىلىم؟!" - دەيدى كومپوزيتور.

سونداي-اق، ول زامانبەك ءنۇرقادىلوۆ ولەر الدىندا حات جازىپ كەتكەن ادامدار ءالى كۇنگە ارامىزدا جۇرگەنىن جەتكىزدى.

"ولەر الدىندا زامانبەك ءنۇرقادىلوۆتىڭ ءتورت پاپكاسى بولدى. ىشىندە قۇجاتتارى بار. سونىڭ ۇشەۋى ماعان بەرىلدى.

زامانبەك ءنۇرقادىلوۆ "قالدىبەككە بەر" دەپ ءۇش حات بەرىپ كەتكەن. بىرەۋى ءاسانالى اشىموۆكە. بىرەۋى امالبەك تشانوۆقا. ەكەۋى دە ءتىرى. ءۇشىنشىسى مۇحتار شاحانوۆقا.

قارا فلوماستەرمەن جازعان. قايتىس بولعاننان كەيىن قولىما ءتيدى. ەكەۋى ءوزى الدى. شاحانوۆ ماعان "ىشىندە نە جازىلعانىن وقى" دەدى. "جوق، ءوزىڭىز وقى" دەدىم.

ءۇش حات، ءۇش ادامعا بەرىلدى. نە جازىلعانىن ءۇش ادام بىلەدى"، - دەيدى ول.

كومپوزيتور ءنۇرقادىلوۆتىڭ شەتەلدەگى قۇندى قۇجاتتارىنىڭ دا شەت جاعاسىن ايتتى.

"شەتەلدە ءبىر جەردە ۇلكەن قۇجات جاتقان سياقتى. ءنۇرقادىلوۆ ءبىر جەرگە قۇجات قويعان. بۇكىل قىلمىستى اشاتىن ايعاقتار بولسا كەرەك.

...ارىستان جۇرەكتى ءنۇرقادىلوۆتى اتتى. بيلىك اتتى.

ءنۇرقادىلوۆتىڭ "بيلىكتىڭ ءار كەزدە ءبىر وعى ارتىق تۇرادى" دەيتىن ءسوزى بولاتىن. قاجەت ەمەس ادامدى ويىننان شىعارىپ جىبەرۋ ءۇشىن قولدانىلاتىن قارۋ بولادى. سول قارۋ زاكەڭنىڭ وزىنە ءتيىپ كەتتى"، - دەدى قالدىبەك ءقۇرمانالى.

كومپوزيتوردىڭ سوزىنشە، سوتتى بولعان شەنەۋنىك مۇحامەدي ۇلى - جاقسى ازامات، ال ىستەگەن ءىسى جۇيەنىڭ كەسىرى-مىس.

"ارىستانبەك مۇحامەدي ۇلىنىڭ جەكە كىناسى ەمەس. ول - جۇيەنىڭ قاتەلىگى.

ون ءبىر جىلعا سوتتادى عوي، تۇرمەدەن شىقسا، قارسى الىپ، بىرگە جۇرۋگە قۋانار ەدىم. جاقسى ازامات.

ونىڭ ىستەگەن ارەكەتى ءوزىنىڭ ارەكەتى ەمەس قوي. مەملەكەتتىك جۇيەدە جەۋگە، قول سالۋعا مۇمكىندىك بەرىپ تۇر عوي. مينيسترلەرگە، مينيسترلەردىڭ ورىنباسارلارىنا، مەملەكەتتىك قىزمەتكەرلەرگە مەملەكەتتىڭ قارجىسىنا قول سالماۋعا جاعداي جاساپ قويسا، جاسامايدى عوي ەشكىم"، - دەيدى ول.

ايتا كەتەيىك، جاقىندا عانا سوت ۇكىمىمەن ارىستانبەك مۇحامەدي ۇلى اسا ءىرى مولشەردە پارا بەرۋگە وقتالعانى ءۇشىن كىنالى دەپ تانىلىپ، قىلمىستىق كودەكستىڭ 58-بابىنىڭ 3 جانە 6-بولىكتەرى نەگىزىندە قىلمىستىق قۇقىقبۇزۋشىلىقتار جيىنتىعى بويىنشا ءومىر بويىنا مەملەكەتتىك قىزمەتتە لاۋازىمداردى اتقارۋعا تىيىم سالىنا وتىرىپ، 11 جىلعا باس بوستاندىعىنان ايىرىلعان ەدى.