Kezinde kúlli eldi dúr silkindirip, "adam jegish" degen atpen tanylǵan Nikolai Jumaǵaliev búginde túrmede otyrǵan joq. Ol Almaty oblysy Aqtas aýylyndaǵy psihiatriialyq aýrýhanada májbúrli em qabyldap jatyr, dep dalanews.kz tilshisi kznews.kz saityna silteme jasap habarlaidy.
Bul týraly Instagram jelisinde jýrnalist Asmira Ermekqyzy jazdy. Ol kezinde osy aýrýhanada 14 jyl boiy qaýipti qylmyskerlermen jumys istegen psiholog Aqmaral Shegentaiqyzymen suhbattasqanyn eske alǵan.
Derekterge súiensek, Nikolai Jumaǵaliev alǵashqy qylmysyn 1978 jyly jasaǵan. Ol jumystan qaityp kele jatqan jas áielge shabýyl jasap, asa aýyr qylmysqa barǵan. Keiin bul is el tarihyndaǵy eń qorqynyshty qylmystardyń biri retinde ataldy.
Resmi derekterde onyń qurbandarynyń sany 57 adam dep kórsetilgenimen, kei mamandar naqty san budan da kóp bolýy múmkin ekenin aitady.
Psihologtardyń sózinshe, Jumaǵaliev zań boiynsha ádettegi sottalǵan adam retinde túrmege qamalmaǵan. Sebebi saraptama onyń psihikalyq aýytqýy bar ekenin anyqtaǵan. Mundai jaǵdaida adam qylmystyq jaza óteýge emes, respýblikalyq deńgeidegi arnaiy psihiatriialyq mekemege jiberiledi.
"Jumaǵaliev – bizdiń eń tártipti em alýshylardyń biri. Psihoemotsionaldy jaǵdaiy turaqty, kóp sóilemeidi", – deidi mamandar.
Psihologtar shizofreniiaǵa shaldyqqan adamdardy syrttai taný óte qiyn ekenin aitady. Mundai naýqastar keide ózin qalypty ustap, suraqtarǵa naqty ári júieli jaýap berýi múmkin. Jumaǵalievtiń de bastapqyda psihikalyq aýrýy birden baiqalmaǵany aitylady. Tergeý kezinde ol suraqtarǵa oryndy jaýap berip otyrǵan.
Mamandardyń aitýynsha, shizofreniiamen aýyratyn kei adamdarda "qoǵamdy jamandyqtan tazartamyn" degen qaýipti ideia qalyptasýy múmkin. Jumaǵaliev te óz áreketterin osyndai oimen túsindirgeni aitylady. Keiin reseilik psihiatrlar júrgizgen saraptama onyń shizofreniiaǵa shaldyqqanyn naqtylaǵan.
Degenmen Jumaǵaliev ózine taǵylǵan qylmystardy tolyq moiyndamaǵan. Ol ótken oqiǵalar týraly ashyq aitpaidy jáne ózin "jalǵan qujatpen qamaldym" dep esepteitini habarlandy.
