Túrkiiada zańsyz óndirilgen alkogolden ýlanyp, 17 ózbekstandyq azamat kóz jumdy, taǵy beseýi jansaqtaý bóliminde jatyr. Bul týraly Ystambuldaǵy Ózbekstan konsýldyǵy habarlady, dep jazady Dalanews.kz.
Sońǵy kúnderi Túrkiianyń eń úlken qalasy – Ystambulda alkogolden ýlaný saldarynan 40-qa jýyq adam qaitys bolǵan.
Ózbekstan konsýldyǵy juma kúni qaza tapqandar sanynyń artqanyn habarlady. Bul kúni taǵy úsh ózbekstandyq azamat kóz jumǵan. Konsýldyq marqumdardyń denelerin Ózbekstanǵa jetkizý úshin qujattardy daiyndap jatqanyn jáne jergilikti aýrýhanalarda emdelip jatqan azamattarǵa kómektesip jatqanyn málimdedi. Sonymen qatar, konsýldyq ókilderi zardap shekken azamattardyń týystarymen jáne Túrkiia biligimen turaqty bailanys ornatqan.
Konsýldyq keibir azamattardyń aýrýhanaǵa barýdan bas tartyp, úide emdelýdi tańdaǵanyn aitty. Olardyń sózinshe, aýrýhanaǵa jatý qarjylai aýyr bolady dep sanaǵan. Alaida mundai sheshimder aýyr saldarǵa ákelgen: búirek jumysynyń jetispeýshiligi, kórý qabiletiniń tómendeýi jáne tynys alý problemalary týyndaǵan.
Túrkiianyń Anadolu agenttiginiń málimetinshe, 92 adam aýrýhanaǵa túsken, onyń ishinde 38 adam qaitys bolǵan. Keibir patsientterge intýbatsiia jasalsa, segiz adam keiin aýrýhanadan shyǵarylǵan.
Ystambul gýbernatorynyń keńsesi beisenbi kúni zańsyz alkogoldi satýǵa qarsy sharalardy kúsheitetinin málimdedi. Quramynda qaýipti metanol siiaqty zattary bar kontrafaktilik alkogoldiń satylymyna tosqaýyl qoiý úshin birqatar qadamdar jasalǵan. Jyl basynan beri 29 tonna jalǵan alkogol tárkilenip, 64 kásiporynnyń jumysy toqtatylǵan. Sonymen qatar, 12 adam ustalyp, olardyń tórteýine "adam óltirý" aiyby taǵyldy.
Dalanews.kz Túrkiiada turatyn Qazaqstan azamattaryna zańsyz ónimnen saqtaný jáne qaýipti jaǵdailarda dereý meditsinalyq kómekke júginý kerektigin eske salady.
