Túrkiia Qorǵanys ministrligi 9 naýryz, dúisenbi kúni NATO-nyń áýe jáne zymyranǵa qarsy qorǵanys júieleri Irannan ushyrylǵan ballistikalyq zymyrandy Túrkiianyń áýe keńistiginde atyp túsirgenin habarlady, dep jazady Dalanews.kz Anadolu agenttigine silteme jasap.
Vedomstvonyń málimetinshe, zymyran synyqtarynyń bir bóligi Gaziantep provintsiiasyndaǵy shóleit aýmaqqa qulaǵan. Oqiǵa saldarynan qaza tapqandar nemese zardap shekkender joq.
Túrkiia biligi eldiń kórshi memlekettermen tatý qarym-qatynasqa jáne óńirlik turaqtylyqqa úlken mán beretinin atap ótti.
«Alaida elimizdiń aýmaǵy men áýe keńistigine baǵyttalǵan kez kelgen qaýipke qarsy barlyq qajetti sharalar batyl ári kidirissiz qabyldanatynyn taǵy da eskertemiz», - dep málimdedi ministrlik.
Zymyran atyp túsirilgennen keiin Túrkiia prezidenti ákimshiligi Irandy óńirdegi shielenisti ýshyqtyrmaýǵa shaqyrdy.
«Óńirdegi jaǵdaidyń ýshyǵyp ketpeýi jáne qaqtyǵystardyń keń aýmaqqa taralmaýy óte mańyzdy. Biz taǵy da barlyq tarapty, eń aldymen Irandy, óńirlik qaýipsizdikke qater tóndiretin ári beibit turǵyndardyń ómirine qaýip tóndirýi múmkin áreketterden bas tartýǵa shaqyramyz», - dedi Túrkiia prezidenti ákimshiliginiń kommýnikatsiialar basqarmasynyń basshysy Býrhanettin Dýran.
Aita keteiik, buǵan deiin dúisenbi kúni Iran Syrtqy ister ministrliginiń resmi ókili Ismail Bagai Iran qarýly kúshteri Kiprge, Túrkiiaǵa jáne Ázerbaijanǵa eshqandai shabýyl jasamaǵanyn málimdegen edi.
