Chavýshoglý sózinshe, AQSh-tyń usynysy Túrkiianyń ulttyq egemendigi ustanymdaryna qaishy keledi.
Túrkiia Reseidiń áýe qorǵanysy júiesin satyp alý jóninde 2017 jyly kelisim jasasqan, kelisim quny 2,5 milliard dollarǵa baǵalanǵan.
2019 jyly Ankara S-400 zymyran kesheniniń alǵashqy polkin alǵan. Bul kelisimge qarsy bolǵan AQSh Túrkiiany F-35 joiǵysh ushaǵynyń jańa býynyna arnalǵan óndiris baǵdarlamasynan shyǵaryp tastaǵany esimizde.
2022 jyly kóktemde Reuters agenttigi "AQSh biligi S-400 áýe qorǵanysy júiesin Ýkrainaǵa berse sanktsiiany alyp tastaýǵa ýáde bergen" degen habar taratqan.
Kiev Batys elderine áýe qorǵanysy júiesin udaiy surap keledi. Osyǵan bailanysty Vashington Reseidiń áýe qorǵanysy júiesin paidalanyp otyrǵan odaqtastaryna ótinish jasap, Ýkrainaǵa berýdi suraǵan.
14 mamyrda Túrkiiada prezident jáne parlament sailaýy qatar ótedi. Qazirgi boljamdarǵa qaraǵanda, Redjep Taiyp Erdoǵan sailaýda jeńilip qalýy ábden múmkin. Erdoǵan Máskeý men Kiev arasynda ara aǵaiyn bolýǵa daiyn ekenin birneshe ret málimdegen.
Byltyr naýryz aiynda Stambýlda Resei men Ýkraina delegatsiiasy kezdesip, kelissózge talpynyp kórgen. Túrkiiany "Ýkrainanyń Resei basyp alǵan jerinde ósirilgen aýyl sharýashylyq ónimderin satyp alyp, Reseige sanktsiia tizimine engen taýarlardy jetkizip jatyr" dep te aiyptaityndar bar.
