Túrksib aýdanynda sport pen balalar oiyn alańdaryn ornatýǵa basymdylyq berilgen
Iske asyrylatyn jobalardyń ishinde: sport pen balalar oiyn alańdaryn ornatý, aýmaqtardy kógaldandyrý, qoǵamdyq oryndardy jóndeý jáne jaryqtandyrý, turmystyq qatty qaldyqtardy jinaýǵa arnalǵan tereń konteinerlik alańdardy ornatý. Bul ózgerister búkil Túrksib aýdanynyń aýmaǵyna oń áser etetin bolady.
Baqytjan Aqjarovtyń aitýynsha, «Biýdjetke qatysýdyń» 28 jobasy jumys ústinde, al toǵyz joba boiynsha konkýrstar ótkizilýde.
– Biz aýdandaǵy aýlalardy abattandyrýdy jalǵastyramyz. 2016 jyldan 2020 jylǵa deiin barlyǵy 496 aýla jóndeldi. Qazirgi ýaqytta «Jas qanat» shaǵyn aýdanyndaǵy 30 aýlany abattandyrý boiynsha jumys josparlanyp otyr, – dedi aýdan ákimi.
Baqytjan Aqjarov aýdanda «Altai-1» shaǵyn aýdanyndaǵy jaiaý júrginshiler aimaǵy abattandyrylatynyn aitty. Munda qala turǵyndary bos ýaqyttaryn ótkize alady, sporttyq oiyndar oinaidy, búkil aýmaq abattandyrylyp, jaryqtandyrylady. Ákim qazirgi ýaqytta Seifýllin alańynda aǵymdaǵy jóndeý jumystary júrgizilip jatqanyn atap ótti.
Sonymen qatar, Áýejai men Balalar shyǵarmashylyǵy úiiniń aýmaǵyndaǵy eki alańdy jańartý josparlanýda, qazirdiń ózinde «Tiksai-Jarbulaq» saiabaǵy men «Maiak» toǵaiyn abattandyrý boiynsha jumystar júrgizilýde.
Sonymen qatar, aýdanda kógaldandyrý jumystary jalǵasýda. Baqytjan Aqjarovtyń aitýynsha, Túrksib aýdanynyń jasyl qorynda 450 myń aǵash bar, bul qalanyń jasyl qorynyń 20%-yn quraidy.
– Almaty ákimi Baqytjan Saǵyntaevtyń million kóshet otyrǵyzý týraly tapsyrmasyn oryndaý aiasynda, Jasyl ekonomika basqarmasymen birlesip, aýdanda 40 myń kóshet otyrǵyzyldy, jyl sońyna deiin taǵy 36 myńyn otyrǵyzý josparlanýda, – dedi Baqytjan Aqjarov.
Aýdandaǵy 10 myń sharshy metrge jýyq gúlzarlardy kútip ustaý jumystary júrgizilýde.
