Bazardyń tehnikalyq ashylýynda óńirdegi birqatar aýdandarynan ónimder saýdalandy. Shardara aýdanynan – balyq pen kúrish, Báidibek aýdanynan – jemis-jidek, Ordabasy aýdanynan – qus eti men jumyrtqa jáne ózge de azyq - túlik arzan baǵada usynylýda.
Saýda kesheni jańa avtovokzal mańynda ornalasqan. Onda ózge oblystar men Ózbekstanǵa kólikter qatynaityn bolady. Zaman talabyna sai saýda ortalyǵynda qala turǵyndaryna jáne Túrki eliniń rýhani astanasyna keletin týristerge qolaily saýda jasaýǵa barlyq jaǵdai jasalǵan.
Bazar aimaǵynda taýar saqtaýǵa arnalǵan 300 mikroklimattyq qoima bar. Sonymen birge «Grand Bazar Yassy & EcoBazar» Ekobazary kelýshilerge qonaq úi, demalatyn oryndar, oiyn-saýyq keshenderin men fýdkortty usynady. Qaýipsizdikti saqtaý úshin kúzet qyzmetkerleri jumys isteidi, beinabaqylaý kameralary ornatylǵan. Barlyq sanitarlyq normalar saqtalǵan. Bazarda elektrondy jáne aqyldy qolarbalar iske qosylady.
Atalǵan bazarda kásipkerler úshin «Iassy biznes» baǵdarlamasy arqyly 4 paiyzben 5 jylǵa 60 million teńgege deiin kepildik arqyly nesie berý kózdelip otyr. Bul jóninde Túrkistan oblysy kásipkerlik jáne saýda basqarmasy men «Damý» kásipkerlikti damytý qorymen kelisim jasalǵan.
Osy tusta erekshe aita keterlik jait, sońǵy jyldary iri qara mal etin óndirýde jáne eksporttaýda Túrkistan oblysy elimizde kósh bastap keledi. Óńirimizdiń et ónimderi Qytai, Ózbekstan, Resei, Iran elderinde, sondai-aq Birikken Arab Ámirlikterinde joǵary suranysqa ie bolyp otyr. Al qaýynǵa Germaniiada suranys joǵary. Bul derekter Túrkistan óńiriniń azyq-túlik ónimderiniń sapaly ári ekologiialyq taza ekendigin ańǵartady. Endi atalǵan ónimder Túrkistandaǵy Ekobazarda jurtshylyqqa usynylyp, osy ortalyqta júzdegen jumys orny qurylmaq. Endi ǵana jumysyn bastap jatqan Ekobazar biyl tolyq kúshine enip, elimizdegi eń tańdaýly saýda oryndarynyń birine ainalatynyna senim mol.
