بازاردىڭ تەحنيكالىق اشىلۋىندا وڭىردەگى ءبىرقاتار اۋداندارىنان ونىمدەر ساۋدالاندى. شاردارا اۋدانىنان – بالىق پەن كۇرىش، بايدىبەك اۋدانىنان – جەمىس-جيدەك، ورداباسى اۋدانىنان – قۇس ەتى مەن جۇمىرتقا جانە وزگە دە ازىق - تۇلىك ارزان باعادا ۇسىنىلۋدا.
ساۋدا كەشەنى جاڭا اۆتوۆوكزال ماڭىندا ورنالاسقان. وندا وزگە وبلىستار مەن وزبەكستانعا كولىكتەر قاتىنايتىن بولادى. زامان تالابىنا ساي ساۋدا ورتالىعىندا قالا تۇرعىندارىنا جانە تۇركى ەلىنىڭ رۋحاني استاناسىنا كەلەتىن تۋريستەرگە قولايلى ساۋدا جاساۋعا بارلىق جاعداي جاسالعان.
بازار ايماعىندا تاۋار ساقتاۋعا ارنالعان 300 ميكروكليماتتىق قويما بار. سونىمەن بىرگە «Grand Bazar Yassy & EcoBazar» ەكوبازارى كەلۋشىلەرگە قوناق ءۇي، دەمالاتىن ورىندار، ويىن-ساۋىق كەشەندەرىن مەن فۋدكورتتى ۇسىنادى. قاۋىپسىزدىكتى ساقتاۋ ءۇشىن كۇزەت قىزمەتكەرلەرى جۇمىس ىستەيدى، بەيناباقىلاۋ كامەرالارى ورناتىلعان. بارلىق سانيتارلىق نورمالار ساقتالعان. بازاردا ەلەكتروندى جانە اقىلدى قولاربالار ىسكە قوسىلادى.
اتالعان بازاردا كاسىپكەرلەر ءۇشىن «ياسسى بيزنەس» باعدارلاماسى ارقىلى 4 پايىزبەن 5 جىلعا 60 ميلليون تەڭگەگە دەيىن كەپىلدىك ارقىلى نەسيە بەرۋ كوزدەلىپ وتىر. بۇل جونىندە تۇركىستان وبلىسى كاسىپكەرلىك جانە ساۋدا باسقارماسى مەن «دامۋ» كاسىپكەرلىكتى دامىتۋ قورىمەن كەلىسىم جاسالعان.
– ەكوبازار – ءداستۇرلى اۋىل شارۋاشىلىعى نارىعىنىڭ جانە زاماناۋي جايلى ساۋدا ورتالىعىنىڭ ارتىقشىلىقتارىن بىرىكتىرەتىن جاڭا فورماتتاعى فەرمەرلەر بازارى. 14 گەكتار جەرگە ورنالاسقان بازاردا 3000-عا جۋىق ساۋدا ورنى بار. ونىڭ ىشىندە 900 ورىن – ازىق-تۇلىككە، 1500 ورىن – كيىم-كەشەككە، 500 ورىن – تۇرمىستىق تۇتىنۋ تاۋارلارىنا ارنايى جابدىقتالعان. جيھازدارعا 1000 شارشى مەتر ورىن دايىندالعان. كوتەرمە باعاداعى بۇل بازار ديقانداردىڭ وزدەرى وندىرگەن اۋىل شارۋاشىلىعى ونىمدەرىن جىلدام وتكىزۋگە، ازىق-تۇلىكتىڭ ساپاسىن ساقتاۋعا، تاسىمالداۋ شىعىنىن ازايتۋعا وتە قولايلى بولماق، – دەيدى ەكوبازاردىڭ باس ديرەكتورى باقنۇر ايۋبەك.
وسى تۇستا ەرەكشە ايتا كەتەرلىك جايت، سوڭعى جىلدارى ءىرى قارا مال ەتىن وندىرۋدە جانە ەكسپورتتاۋدا تۇركىستان وبلىسى ەلىمىزدە كوش باستاپ كەلەدى. ءوڭىرىمىزدىڭ ەت ونىمدەرى جۇڭگو، وزبەكستان، رەسەي، يران ەلدەرىندە، سونداي-اق بىرىككەن اراب امىرلىكتەرىندە جوعارى سۇرانىسقا يە بولىپ وتىر. ال قاۋىنعا گەرمانيادا سۇرانىس جوعارى. بۇل دەرەكتەر تۇركىستان ءوڭىرىنىڭ ازىق-تۇلىك ونىمدەرىنىڭ ساپالى ءارى ەكولوگيالىق تازا ەكەندىگىن اڭعارتادى. ەندى اتالعان ونىمدەر تۇركىستانداعى ەكوبازاردا جۇرتشىلىققا ۇسىنىلىپ، وسى ورتالىقتا جۇزدەگەن جۇمىس ورنى قۇرىلماق. ەندى عانا جۇمىسىن باستاپ جاتقان ەكوبازار بيىل تولىق كۇشىنە ەنىپ، ەلىمىزدەگى ەڭ تاڭداۋلى ساۋدا ورىندارىنىڭ بىرىنە اينالاتىنىنا سەنىم مول.
