Túristan oblysy Maqtaaral aýdanynan Jambyl oblysy Baızaq aýdanyna 10 tonna gýmanıtarlyq kómek jetkizdi. Kómek qolyn sozýǵa Maqtaaral aýdanyndaǵy sý tasqynynan zardap shekken Órgebas, Ferdaýsı aýyldarynyń turǵyndary jáne aýdannyń kásipkerleri belsendilik tanytty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Azyq-túlik tıelgen júk kóligi Baızaq aýdanyna jetkizilip, jergilikti ákimdik tarapynan uıymdastyrylǵan ortalyq qoımaǵa ornalastyryldy.

– Ótken jyly Maqtaaral aýdanynda sý tasqyny oryn alǵan kezde eń alǵash bolyp Jambyl oblysynan kómek kelgen bolatyn. Sonymen qatar, barsha el-jurtymyz bizdiń aýdanǵa toqtaýsyz kómekterin jiberip otyrdy. Sondyqtan, Jambyl oblysy Baızaq aýdanynda oryn alǵan jaǵdaı boıynsha úı-kúısiz qalǵan otandastarymyzdyń taǵdyry bizdi alańdatyp, gýmanıtarlyq kómekti alǵashqylardyń biri bolyp alyp kelýge sebepshi boldy, – dedi «Jastar resýrstyq ortalyǵy» KMM dırektory Súndet Kenjebaev.



«Baızaq aýdany, biz birgemiz!» gýmanıtarlyq kómek tótenshe jaǵdaıdan zardap shekken turǵyndarǵa úlestiriletin bolady. Jergilikti jaýapty basshylar kelgen kómektiń esebin alyp, qıyn sátte qol ushyn sozǵan maqtaaraldyqtarǵa alǵystaryn bildirdi. Zardap shekken aǵaıynǵa daıyndalǵan kómek kerýenine kúrish, maı, makaron ónimderi, qant, qaraqumyq, jeńil daıyndalatyn tamaq ónimderi, táttiler jáne mıneraldy sýsyndar tıelgen.