Túrkistan oblysy Saryaǵash aýdanynda «ELBASY JOLY.ASTANA» fılminiń kórsetilimi ótti.
Memleket basshysynyń júrip ótken dańǵyl jolynan syr shertetin týyndynyń kórsetilimine oblys basshysy Janseıit Túımebaev qatysty. Sondaı-aq, oblys ardagerleri men zıaly qaýym ókilderi, BAQ qyzmetkerleri men óńir turǵyndary tamashalady.
«Elbasy joly. Astana» fılmi bolǵan oqıǵanyń jelisinde túsirilgen. Ǵumyrnamalyq týyndynyń avtory belgili rejıser Aqan Sataev.
Shyǵarmada elordanyń kóshýi, sol kezeńdegi qıyndyqtar, jappaı qurylys pen memleket qurýdaǵy ilgeri ister sýrettelgen.
Shyǵarmanyń kórsetilimine qatysqan oblys ákimi jıylǵan qaýymdy Táýelsizdik merekesimen quttyqtap, fılmge tuzdyq bolar óz estelikterimen de bólisti.
«Sizderdi Ulyq merekemiz – QR Táýelsizdigi kúnimen shyn júrekten quttyqtaımyn! Táýelsizdik kúni – Qazaqstannyń árbir azamaty úshin qasterli mereke. Ǵasyrlar boıy azattyq ańsaǵan eldiń armany osydan 27 jyl buryn oryndalyp, memleketimiz óz táýelsizdigin jarıalady. Tuńǵysh Prezıdentimiz – Ult Kóshbasshysy Nursultan Nazarbaevtyń salıqaly saıasatynyń arqasynda biz zamanaýı, ashyq ári demokratıa qaǵıdalaryna adal qoǵam qura bildik. Búgin nazarlaryńyzǵa usynylyp otyrǵan «Elbasy joly. Astana» fılmi el astanasynyń Almatydan Aqmolaǵa kóshirilgen sátin sıpattaıdy. Elbasymyz elordany Aqmolaǵa kóshirý jónindegi oıyn bildirgen sátte ol sheshimdi qoldamaǵandar kóp boldy. Degenmen, Astana ultty uıystyryp, qazaqtyń mártebesin kótergen ordaǵa aınaldy. Elbasymyzdyń tarıhı sheshimi durys ekenin ýaqyt dáleldep berdi. Prezıdentimizdiń Táýelsizdigimizdi tuǵyrly etý jolyndaǵy qajyrly eńbegi men ıgi bastamalaryn el biledi jáne qurmetteıdi», - dedi Janseıit Qanseıituly.
Fılmniń basty keıipkeri - memlekettik qyzmetker. Ol Elbasynyń qasynda júrip ótkenin eske alady. Nursultan Nazarbaevtiń rólin belgili akter Murat Aqmanov somdaǵan. Fılm tarıx xronologıasyna saı naqty datalarmen jáne sol tusta túsirilgen tarıhı beınelermen kórkemdelgen.
Elbasy ǵumyrnamasy men elorda tarıhyna negizdelgen fılm túrkistandyq kórermen qaýymnyń kóńilinen shyǵyp, týyndyǵa joǵary baǵalaryn berdi.
