Túrkistan bilim-innovatsiia litseiiniń oqýshysy Abdýrahmanov Islam álemniń 40 ýniversitetine grant jeńip aldy. Ol BAÁ, AQSh, Angliia, Polsha, Malaiziia, Shveitsariia memleketterindegi qalaǵan joǵary oqý ornynyń stýdenti atana alady, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Islam 7-shi synyptan bastap túrli bilim saiystarynda jetistikterge qol jetkizdi. Intellektýaldy jarystardy negizge alyp, olardyń ishinde shahmatpen erekshe ainalysty. Sonyń aiasynda qalalyq jáne oblystyq deńgeide ótken túrli jarystarda altyn men qolaǵa qol jetkizdi.
«8-shi synypta aiti salasyna qyzyǵýshylyǵymdy oiatyp, jańa baǵytqa qadam bastym. Bul salada respýblikalyq deńgeide ótken «Hackathon» atty jarystan altynǵa qol jetkizdim, osy is sharada alǵan tájiribem Qazaqstandaǵy bilim olimpiadasynan. birinshi oryn ielenýime sebepker boldy. 9-shy synypta qoǵamdyq istermen ainalysamyn dep sheshtim. Túrkistan qalasynyń «Eco Turkistan» klýbynyń múshesi boldym jáne ol jerde biraz tájiribe ala otyra, Kentaý qalasynda ózimniń «Green Team» atty jeke eko klýbymdy ashtym», deidi ol.
11 synyptan bastap joǵary oqý ornyna túsýdi qolǵa alǵan Islam álemniń 6 elinen 40-tan astam ýniversitetinen shaqyrtý alyp, oblystyń abyroiyn asqaqtatty.
Islamnyń tańdaýy AQSh-tyń Tehas shtaty, Hiýston qalasyndaǵy «North American University(NAU)» mekemesine tústi. Úzdik oqýshy shet elde bilim alyp, Otanǵa oralyp, eńbek etýdi kózdep otyr.
