Keńeste áleýmettik salaǵa jaýapty ministrlik pen qurylymdardyń basshylary jalaqyny kóterý baǵytyndaǵy jumystary men usynystaryn aitty. QR Premer-ministri Baqytjan Saǵyntaev oblystar men Astana, Almaty jáne Shymkent qalasynyń ákimderine kásiporyndarda jalaqyny kóterý boiynsha túsindirme jumystar júrgizip, eńbek zańnamalaryn saqtaý jáne jumysshylardyń eńbekaqysyn kóterý jóninde naqty mindetter júktedi.
Selektorlyq májiliste Túrkistan oblysynyń ákimi Janseiit Túimebaev Elbasy Joldaýyndaǵy jalaqyny kóterý tapsyrmasyn oryndaý baǵytynda óńirde naqty is-sharalar atqarylyp jatqanyn aitty. Óńir basshysynyń aitýynsha, búginde oblys aýmaǵyndaǵy 9798 kásiporynda 105811 jumysshynyń 13674-i (12,9%) 42500 teńgeden tómen jalaqy alady. Bul derekter oblys ákimdigi júrgizgen arnaiy taldaý nátijesinde anyqtalǵan. Budan bólek, oblystaǵy memlekettik biýdjettik mekemelerde 42 500 teńgeden tómen jalaqy alatyn 52 170 jumysshy bar ekeni belgili boldy.
Úkimettik selektorǵa oblys ákiminiń bastamasymen 20-ǵa jýyq iri jáne orta kásiporyndardyń basshylary qatysqan bolatyn. Solardyń biri – «Kentaý transformator zavody» aktsionerlik qoǵamynyń bas direktory Hairýlla Qojabaev kásiporyndaǵy ortasha jalaqyny 40 paiyzǵa kóterýge daiyn ekenin, iaǵni, ortasha jalaqy 75 myńnan 105 myń teńgege deiin ósetinin aitty. «Kas Beton» JShS-inde ortasha jalaqy edáýir kóteriledi. Ózge de kásiporyn basshylary Elbasy Joldaýyna qoldaý kórsetip, jumysshylardyń áleýmettik jaǵdaiyn jaqsartýǵa kúsh salatyndaryn jetkizdi.
Jalpy, óńirdegi júzge jýyq iri jáne orta kásiporyndar men mekemelerde túsindirý jumystary jáne kelissózder júrgizilip, olardyń basym bóliginiń basshylary jumysshylarynyń jalaqysyn kóterýge kelisim berdi. Jumysshylardyń jalaqysyn kóterý jónindegi jumystar ózge kásiporyndarda da jalǵasyn tabady.
Túrkistan oblysy ákiminiń baspasóz qyzmeti
