كەڭەستە الەۋمەتتىك سالاعا جاۋاپتى مينيسترلىك پەن قۇرىلىمداردىڭ باسشىلارى جالاقىنى كوتەرۋ باعىتىنداعى جۇمىستارى مەن ۇسىنىستارىن ايتتى. ق ر پرەمەر-مينيسترى باقىتجان ساعىنتايەۆ وبلىستار مەن استانا، الماتى جانە شىمكەنت قالاسىنىڭ اكىمدەرىنە كاسىپورىنداردا جالاقىنى كوتەرۋ بويىنشا تۇسىندىرمە جۇمىستار جۇرگىزىپ، ەڭبەك زاڭنامالارىن ساقتاۋ جانە جۇمىسشىلاردىڭ ەڭبەكاقىسىن كوتەرۋ جونىندە ناقتى مىندەتتەر جۇكتەدى.
سەلەكتورلىق ماجىلىستە تۇركىستان وبلىسىنىڭ اكىمى جانسەيىت تۇيمەبايەۆ ەلباسى جولداۋىنداعى جالاقىنى كوتەرۋ تاپسىرماسىن ورىنداۋ باعىتىندا وڭىردە ناقتى ءىس-شارالار اتقارىلىپ جاتقانىن ايتتى. ءوڭىر باسشىسىنىڭ ايتۋىنشا، بۇگىندە وبلىس اۋماعىنداعى 9798 كاسىپورىندا 105811 جۇمىسشىنىڭ 13674ء-ى (12،9%) 42500 تەڭگەدەن تومەن جالاقى الادى. بۇل دەرەكتەر وبلىس اكىمدىگى جۇرگىزگەن ارنايى تالداۋ ناتيجەسىندە انىقتالعان. بۇدان بولەك، وبلىستاعى مەملەكەتتىك بيۋدجەتتىك مەكەمەلەردە 42 500 تەڭگەدەن تومەن جالاقى الاتىن 52 170 جۇمىسشى بار ەكەنى بەلگىلى بولدى.
– وسىعان وراي، اتالعان كاسىپورىندار مەن مەكەمەلەردە ەلباسىنىڭ جولداۋىن ىسكە اسىرۋ ماقساتىندا ۇگىت-ناسيحات جۇمىستارى جۇرگىزىلىپ، ناتيجەسىندە 88 كاسىپورىن 2019 جىلدىڭ 1 قاڭتارىنان باستاپ جالاقىنى وسىرەتىن بولدى. الداعى ۋاقىتتا بۇل باعىتتاعى جۇمىستار جالعاسادى، – دەدى ج.تۇيمەبايەۆ.
ۇكىمەتتىك سەلەكتورعا وبلىس اكىمىنىڭ باستاماسىمەن 20-عا جۋىق ءىرى جانە ورتا كاسىپورىنداردىڭ باسشىلارى قاتىسقان بولاتىن. سولاردىڭ ءبىرى – «كەنتاۋ ترانسفورماتور زاۆودى» اكسيونەرلىك قوعامىنىڭ باس ديرەكتورى حايرۋللا قوجابايەۆ كاسىپورىنداعى ورتاشا جالاقىنى 40 پايىزعا كوتەرۋگە دايىن ەكەنىن، ياعني، ورتاشا جالاقى 75 مىڭنان 105 مىڭ تەڭگەگە دەيىن وسەتىنىن ايتتى. «كاس بەتون» جشس-ىندە ورتاشا جالاقى ەداۋىر كوتەرىلەدى. وزگە دە كاسىپورىن باسشىلارى ەلباسى جولداۋىنا قولداۋ كورسەتىپ، جۇمىسشىلاردىڭ الەۋمەتتىك جاعدايىن جاقسارتۋعا كۇش سالاتىندارىن جەتكىزدى.
جالپى، وڭىردەگى جۇزگە جۋىق ءىرى جانە ورتا كاسىپورىندار مەن مەكەمەلەردە ءتۇسىندىرۋ جۇمىستارى جانە كەلىسسوزدەر جۇرگىزىلىپ، ولاردىڭ باسىم بولىگىنىڭ باسشىلارى جۇمىسشىلارىنىڭ جالاقىسىن كوتەرۋگە كەلىسىم بەردى. جۇمىسشىلاردىڭ جالاقىسىن كوتەرۋ جونىندەگى جۇمىستار وزگە كاسىپورىنداردا دا جالعاسىن تابادى.
تۇركىستان وبلىسى اكىمىنىڭ باسپا ءسوز قىزمەتى
