Túrkistan oblysynyń ákimi Nuralhan Kósherovtiń tóraǵalyǵymen ótken keńes otyrysynda qurylys salasyndaǵy josparlanǵan jobalar pysyqtalyp, olardyń sáýlettik kelbeti men aimaqtyń damý strategiiasyna sáikestigi talqylandy. Jiynda turǵyn úi, týrizm, mádeniet baǵytyndaǵy jańa nysandardyń jobalary usynyldy,- dep habarlaidy Dalanews.kz
Túrkistan oblysynda boi kóteretin nysandardyń sáýleti bekitilgen dizain kodqa sáikes salynýy shart. Árbir nysannyń qurylysy qatań baqylaýda tur.
Oblys ákimi Nuralhan Kósherov jaýapty basqarmalarǵa arhitektýralyq sheshimderde óńirdiń ereksheligi men ulttyq naqyshty saqtai otyryp, zamanaýi tsifrlyq múmkindikterdi keńinen qoldanýdy júktedi.
– Óńirde salynatyn nysandardyń eskizdik jobalaryn ázirleý barysynda jasandy intellekt múmkindikterin tiimdi paidalaný kerek. Sonymen qatar jobalar zamanaýi talaptarǵa sai, estetikalyq jáne fýnktsionaldyq turǵydan úilesimdi bolýy tiis, – dedi Nuralhan Oralbaiuly.
Jeke investorlar «Jańa qala» móltek aýdany aýmaǵynda turǵyn úi keshenderin salý, demalys aimaǵy bar qonaq úi salý, jańa meshit aýmaǵyna kommertsiialyq nysandar salý jobalaryn tanystyrdy. Sonymen qatar oblys ortalyǵynan boi kóteretin «Filormoniia» men qalalyq ákimshilik ǵimaratynyń sáýleti kórsetildi. Odan bólek, Shardara jaǵajaiynyń aýmaǵyn abattandyrý jaiy talqylanyp, Túlkibasta «Balyqkól» jobasyn iske asyrý boiynsha usynys aityldy.
Oblys ákimi árbir jobanyń sapasyna, qoldanylatyn materialdarǵa, abattandyrý jumystaryna erekshe nazar aýdarýdy tapsyrdy. Sonymen qatar jergilikti turǵyndardyń ómir súrý sapasyn arttyrýǵa baǵyttalǵan jobalarda fýnktsionaldyq pen qoljetimdilik mańyzdy ekenin atap ótti. Jaýapty tulǵalarǵa usynylǵan jobalardy naqtylap, bekitilgen merzimge sáikes júzege asyrýdy tapsyrdy.
