Qyzylorda oblysynda 83 zańsyz qoqys úiindisi joiylyp, arnaiy poligondarǵa 700 tonnadan astam qaldyq shyǵaryldy, dep habarlaidy dalanews.kz.
«Búgingi tańda atqarylǵan jumystardyń nátijesinde 83 zańsyz qoqys úiindisi anyqtalyp, olardyń barlyǵy sanitarlyq talaptarǵa sáikestendirildi. Mamandandyrylǵan poligondarǵa 700 tonnadan astam qaldyq shyǵaryldy», – delingen bas prokýratýra habarlamasynda.
Vedomstvonyń málimetinshe, ekologiialyq zańnamany buzyp, qorshaǵan ortany lastaǵany úshin 590 azamat ákimshilik jaýapkershilikke tartylǵan.
Sonymen qatar jumys toby zańsyz qoqys oryndarynyń qaita paida bolýynyń aldyn alý maqsatynda problemaly aýmaqtarǵa beinebaqylaý kameralary men eskertý belgilerin ornatýdy usyndy.
