Ákimniń atap ótkenindei qazirgi tańda Túrkistan óńiri men Qazaqstannyń kieli jerleri kartasyna engen nysandar týraly birneshe tilde arnaiy rolikter jáne «Ontustik TourAudio» mobildi qosymshasy ázirlenip jatyr. Odan bólek, kieli jerler týraly aqparat alýdyń qoljetimdiligin, týrizm salasynyń áleýetin arttyrý maqsatynda týristerdiń jii baratyn 35 týristik nysanda QR-kodtar ornatylǵan eken.
"Kúni keshe ǵana tarihi shaharymyzǵa millionynshy týrist aiaq basty. Bul kórsetkishti ótken jylmen salystyrsaq, 57,2 paiyzǵa óskenin ańǵarýǵa bolady. Al, aldaǵy mejemiz, 2025 jylǵa qarai qalamyzǵa keletin týrister sanyn 5 millionǵa jetkizý kózdelip otyr», – dedi bul rette Janseiit Qanseiituly.
Aita ketsek Elbasy óz sózinde Túrkistan oblysynyń qurylýy rýhani jańǵyrýdyń basty, qundy sheshimderiniń biri ekenine toqtalyp, Túrkistandy túrki áleminiń rýhani ortalyǵyna ainaldyrý qajettigi týraly naqty mindet qoiǵan bolatyn.
Janseiit Túimebaevtyń aitýynsha osy tapsyrmany oryndaý maqsatynda oblystaǵy qasietti, kieli oryndar men týristik mańyzy bar eskertkishter boiynsha 21 baǵytta týristik marshrýttar ashylǵan. Odan bólek, Túrkistan qalasy boiynsha tarihi-mádeni eskertkishterdiń jinaǵy basylatyn bolady. Oblystaǵy airyqsha mańyzy bar tarihi-mádeni sáýlettik jáne arheologiia eskertkishteriniń fotoalbomy qazaq, orys, aǵylshyn tilderinde jasalynyp, «Ońtústiktiń qasietti oryndary: ańyz-ápsanalar jinaǵy» men «Ońtústik Qazaqstan oblysynyń tarihi oryndary men kieli jerleri» kitaby jaryq kórdi.
