Túrkistan oblysynyń Maqtaaral aýdanynda 59 jastaǵy áiel telefon alaiaqtarynyń qurbany bola jazdady. Qaskóiler onyń atyna 5 mln teńge nesie rásimdep, aqshany ózderine aýdartýǵa tyrysqan, dep habarlaidy dalanews.kz.
Alaiaqtar aldymen áielge telefon soǵyp, týystaryna poshta arqyly syilyq kelgenin aitqan. Keiin senimine kirip, uialy telefonyna kelgen rastaý kodyn surap alǵan. Osydan soń áieldiń atyna 5 mln teńge nesie rásimdelgen. Qaskóiler ony aqshany ózderine aýdarýǵa kóndirmek bolǵan.
Alaida bank terminalynyń janynda kúmándi qarjylyq operatsiia jasap turǵan áieldi politsiia qyzmetkeri baiqap qalǵan. Ol jaǵdaidy anyqtap, áieldiń alaiaqtardyń arbaýyna túskenin túsindirdi. Nátijesinde qarjylyq operatsiiany toqtatýǵa kómektesti.
Aita keteiik, kúni keshe Taldyqorǵan qalasynda da osyǵan uqsas jaǵdai bolǵan. Taldyqorǵandyq zeinetker áiel telefon alaiaqtaryna aldanyp, 3,5 mln teńgesin aýdaryp jibergen. Qaskóiler odan taǵy 2 mln teńge aýdarýdy talap etken kezde jergilikti turǵyndar aralasyp, áieldi alaiaqtardyń arbaýyna túskenine sendirip, áreketin toqtatýǵa kómektesken.
Oqiǵa kezinde ózin zeinetkerdiń balasy retinde tanystyrǵan er adam áieldi «mama» dep ataǵan. Al turǵyndar kúmándi jaǵdaiǵa aralasa bastaǵanda, ol ashýǵa minip, olardyń birine qarsy shyqqan.
«Sen kimsiń? Telefonǵa nege qolyńdy sozyp jatyrsyń?» – degen ol er adamdardyń birine.
Oqiǵa kýágerleri bolǵan jaitty videoǵa túsirip alǵan. Taldyqorǵan qalalyq politsiia departamenti turǵynnyń aryzy negizinde alaiaqtyq faktisi boiynsha qylmystyq is qozǵalǵanyn rastady. Qazir tergeý júrgizilip jatyr.
Politsiia azamattarǵa belgisiz adamdardyń telefon arqyly bergen nusqaýlaryn oryndamaýǵa jáne aqshany «qaýipsiz shottarǵa» aýdarmaýǵa keńes beredi. Kúdikti qońyraýlar túsken jaǵdaida 102 nómirine habarlasý qajet.
