اكىمنىڭ اتاپ وتكەنىندەي قازىرگى تاڭدا تۇركىستان ءوڭىرى مەن قازاقستاننىڭ كيەلى جەرلەرى كارتاسىنا ەنگەن نىساندار تۋرالى بىرنەشە تىلدە ارنايى روليكتەر جانە «Ontustik TourAudio» ءموبيلدى قوسىمشاسى ازىرلەنىپ جاتىر. ودان بولەك، كيەلى جەرلەر تۋرالى اقپارات الۋدىڭ قولجەتىمدىلىگىن، تۋريزم سالاسىنىڭ الەۋەتىن ارتتىرۋ ماقساتىندا تۋريستەردىڭ ءجيى باراتىن 35 تۋريستىك نىساندا QR-كودتار ورناتىلعان ەكەن.
"كۇنى كەشە عانا تاريحي شاحارىمىزعا ميلليونىنشى تۋريست اياق باستى. بۇل كورسەتكىشتى وتكەن جىلمەن سالىستىرساق، 57،2 پايىزعا وسكەنىن اڭعارۋعا بولادى. ال، الداعى مەجەمىز، 2025 جىلعا قاراي قالامىزعا كەلەتىن تۋريستەر سانىن 5 ميلليونعا جەتكىزۋ كوزدەلىپ وتىر»، – دەدى بۇل رەتتە جانسەيىت قانسەيىت ۇلى.
ايتا كەتسەك ەلباسى ءوز سوزىندە تۇركىستان وبلىسىنىڭ قۇرىلۋى رۋحاني جاڭعىرۋدىڭ باستى، قۇندى شەشىمدەرىنىڭ ءبىرى ەكەنىنە توقتالىپ، تۇركىستاندى تۇركى الەمىنىڭ رۋحاني ورتالىعىنا اينالدىرۋ قاجەتتىگى تۋرالى ناقتى مىندەت قويعان بولاتىن.
جانسەيىت تۇيمەبايەۆتىڭ ايتۋىنشا وسى تاپسىرمانى ورىنداۋ ماقساتىندا وبلىستاعى قاسيەتتى، كيەلى ورىندار مەن تۋريستىك ماڭىزى بار ەسكەرتكىشتەر بويىنشا 21 باعىتتا تۋريستىك مارشرۋتتار اشىلعان. ودان بولەك، تۇركىستان قالاسى بويىنشا تاريحي-مادەني ەسكەرتكىشتەردىڭ جيناعى باسىلاتىن بولادى. وبلىستاعى ايرىقشا ماڭىزى بار تاريحي-مادەني ساۋلەتتىك جانە ارحەولوگيا ەسكەرتكىشتەرىنىڭ فوتوالبومى قازاق، ورىس، اعىلشىن تىلدەرىندە جاسالىنىپ، «وڭتۇستىكتىڭ قاسيەتتى ورىندارى: ءاڭىز-اپسانالار جيناعى» مەن «وڭتۇستىك قازاقستان وبلىسىنىڭ تاريحي ورىندارى مەن كيەلى جەرلەرى» كىتابى جارىق كوردى.
