Túrkistanda Sabyr Raqymov dodasynyń jeńimpazdary men júldegerleri anyqtaldy
Túrkistanda zaman talabyna sai boi túzegen «OLIMPIC CENTER» sport kesheninde ótken halyqaralyq saiysqa Resei, Ózbekstan, Qyrǵyzstan, Təjikstan men Qazaqstannan eń tańdaýly jas balýandary qatysty. Halyqaralyq týrnirge erlerden 410 balýan qatyssa, qyzdardan 110-nan astam burymdy sportshy baqtaryn synady. 11 salmaq boiynsha júldeler sarapqa salyndy.
Halyqaralyq týrnirde Túrkistan oblysynyń namysyn qorǵap, 52 kelide óner kórsetken Dinmuhamed Mergenbai qola júlde ielendi. Budan bólek Qýandyq Shalqar da qola medaldi qanaǵat etti. Al 79 kelide Elnar Shildebai altyn medaldi qanjyǵasyna bailasa, osy salmaqta túrkistandyq Bekzat Tildebaev pen 86 kelide baq synaǵan Imanǵali Qaldybek qola júldeni enshiledi.
Batyr babanyń júldesine arnalǵan halyqaralyq saiysta Túrkistan oblysynyń daryndy balýan qyzdar jarady. 50 kelide túrkistandyq Baljan Shəkir jeńimpaz atanyp, altyn medal jeńip aldy. Sonymen qatar 53 kelide beldesken Shuǵyla Ómirbek — kúmis, al, Eńlik Qabylbek qola júldeger atandy. Danagúl Məlken týrnirdiń jeńimpazy atansa, Madina Aman kúmis alqany enshiledi. Nýlifar Raimova qola júldeger atansa, Shəmshiiabaný Tastanbek kúmis júldege ie boldy. 72 keli salmaqta sheberligin kórsetken Nurjamal Nurma kúmis alqany mise tutsa, 76 keli salmaqtaǵy jas sportshy qyz Arailym Altynbek te kúmis júldeger atandy. Týrnirdiń jeńimpazdary men júldegerleri baǵaly syilyqtarmen, diplommen marapattaldy.
Bul saiysta Resei, Ózbekstan, Qyrǵyzstan Təjikstan balýandarynyń da myqty ekendigi ańǵaryldy. Olar da júldeli oryndardan kórindi.
