Túrkistanda eki kúnge sozylǵan Halyqaralyq sımpozıým ótip jatyr. 27-28 sáýir kúnderi Túrkıanyń úzdik hırýrg dárigerleri eki kún boıy óz tájirıbelerimen bólisedi. Shara barysynda «balalardyń týa bitken» aýrýlary men «sút bezi qaterli isigin» ota ádisimen emdeý máseleleri talqylanbaq, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.  

Sımpozıýmǵa Túrkıanyń «Lıv Ýlýs» klınıkasynyń bilikti dárigerleri arnaıy keldi. Búginde Túrkıada atalmysh mekemeniń 17 qalada 37 aýrýhanasy bar. Jıynda alǵashqy bolyp hırýrgıa salasynda 33 jyldyq tájirıbesi bar Selamı myrza sóz sóıledi. Onyń aıtýynsha, pandemıa jaǵdaıynda B2B formatynda kezdesý uıymdastyrý dárigerler úshin zor múmkindik.

– Búgingi kezdesý biz úshin óte mańyzdy. 33 jyl hırýrgıa salasynda qyzmet etip kelemin. Meniń Qazaqstannan keletin naýqastarym kóp bolǵan. Bir baıqanaym qazaqstandyq dárigerlerdiń tájirıbesi mol. Sondyqtan búgingi jıyn barlyǵymyz úshin paıdasy zor. Biz ózara tájirıbemen bólisip, biliktiligimizdi arttyratyn bolamyz, – deıdi profesor Selamı Sezúbır.

Sharaǵa sondaı-aq,  Túrkistan oblysynyń dárigerleri de qatysýda. Aımaqta búginde jalpy 23 429 medısına qyzmetkeri bar. Onyń 5000-nan astamy dárigerler, qalǵandary orta býyn mamandary.

Elimizde jyl saıyn ana men bala densaýlyǵyn saqtaýǵa erekshe kóńil bólinip keledi. Prezıdent Joldaýlarynda, densaýlyq saqtaý salasyn damytýǵa arnalǵan baǵdarlamalarda bul másele nazardan tys qalǵan emes.